ယူနိုက်တက် နည်းပြ ဆိုးလ်ရှား ကတော့ အိမ်ပြန်လာလာချင်း မန်ချက်စတာ ယူနိုက်တက် အသင်း အတွက် ရော်နယ်ဒို ဂိုးသွင်းယူနိုင်မလား ဆိုတဲ့ သတင်း အပေါ် လုံးဝ သံသယ မဖြစ်မိခဲ့ကြောင်း နယူးကာဆယ် နဲ့ ပွဲစဥ် အပြီး သတင်းစာ ရှင်းလင်းပွဲမှာ ပြောခဲ့လိုက် ပါတယ် ။
မန်ချက်စတာ ယူနိုက်တက် အသင်းဟာ မနေ့ညက အိုးလ် ထရပ်ဖို့ဒ် ကွင်းထဲမှာ နယူးကာဆယ် အသင်းကို ဧည့်ခံ ကစားခဲ့ရပြီး 4 – 1 ဆိုတဲ့ ရလဒ် နဲ့ အနိုင်ယူ ခဲ့ရာမှာ တိုက််စစ်မှူးသစ် ရော်နယ်ဒိုဟာ အဖွင့်ဂိုး နဲ့ ဦးဆောင်ဂိုးတွေကို သွင်းယူပေးနိုင်ခဲ့ပါတယ် ။
အခုတော့ ယူနိုက်တက်တို့ဟာ ပွဲစဥ် 4 ပွဲ ကစားပြီးချိန် 3 ပွဲနိုင် 1 ပွဲသရေ နဲ့ အမှတ်ပေး ဇယားကို ဦးဆောင်ထားနိုင်ခဲ့ပါပြီ ။ ဒီပွဲ အပြီးမှာတော့ ဆိုးလ်ရှားက အသက် 36 နှစ် အရွယ် ရော်နယ်ဒိုရဲ့ ခြေစွမ်းအပေါ်မှာ သံသယ မဖြစ်ခဲ့မိကြောင်း ထုတ်ဖော် ပြောကြား သွားခဲ့လိုက် ပါတယ် ။
” ကျွန်တော်ကတော့ အဲ့လိုမျိုး မထင်မိပါဘူး ။ သူဘာလုပ်ခဲ့လဲဆိုတာ ကျွန်တော်တို့ သိထားပြီးသားပါ ။ ခရစ္စတီယာနိုဟာ လူတိုင်းကို မြှင့်တင်ပေးနိုင်တဲ့ ကစားသမားမျိုးပါ ။ သူ ရှိနေတဲ့ နေရာရဲ့ အနီးတဝိုက်က ကစားသမားတွေကို ပိုပြီး အာရုံ စူးစိုက် ကစားနိုင်အောင် လွှမ်းမိုးပေးနိုင်သူ တစ်ဦးပါပဲ ”
” သူဟာ မိမိကိုယ်တိုင် အပေါ် တောင်းဆိုမှုတွေ ထားရှိတတ်သလို အသင်းဖော်တွေနဲ့ ကျွန်တော်တို့တွေ အပေါ်လည်း တောင်းဆိုမှုတွေ ထားရှိနေတတ်သူ တစ်ဦးပါပဲ ။ ဒါ့ကြောင့်လည်း သူဟာ ဘဝမှာ ဒီလောက်အထိ လုပ်ပြနိုင်ခဲ့တာပါ ။ သူဟာ စည်းကမ်းကြီးလွန်းသူ တစ်ဦးပါပဲ ”
” သူဟာ ကစားသမား တစ်ဦးအဖြစ်နဲ့ တိုးတက်ပြီးရင်း တိုးတက်လာခဲ့သူပါ ။ သူ အသင်းကနေ ထွက်ခွာခဲ့စဥ်က ခြားနားတဲ့ ကစားသမား ဖြစ်ခဲ့ပါတယ် ။ ဒါပေမဲ့ သူဟာ အခုထိ ညှာတာမှု ကင်းမဲ့ဆဲ ၊ ဂိုးသွင်း သေသပ် ကောင်းမွန််ဆဲ ကစားသမား တစ်ဦးအဖြစ် အစွမ်းပြနေဆဲပါပဲ ”
” သူဟာ ပွဲစဥ်အတွင်း ကြီးမားတဲ့၊ အရေးကြီးတဲ့ အခိုက်အတန့်တွေကို အာရုံခံနိုင်စွမ်း ရှိပါတယ် ။ ဘယ်လို အချိန်မှာ ဂိုးသွင်းလို့ ရနိုင်မလဲဆိုတာကို သူကောင်းကောင်း သိနိုင်သူ တစ်ဦးအဖြစ် ရှိနေသေးဆဲပါပဲ ” လို့ ဆိုးလ်ရှားက ကျဆင်း မသွားသေးတဲ့ ရော်နယ်ဒို ရဲ့ အရည်အသွေးတွေကို ထုတ်ဖော် ချီးကျူး သွားခဲ့လိုက်ပါတယ် ။
အဲ့ဒီနောက် ယူနိုက်တက် အသင်းဆီ ရောက်လာခဲ့ပြီး ပွဲစဥ်မတိုင်မီ အသင်းရဲ့ ဟော်တယ်မှာ အသင်းဖော်တွေနဲ့ အတူ ရှိနေခဲ့စဥ် ရော်နယ်ဒိုဟာ Team Talk အဖြစ် ဘာတွေ ပြောခဲ့သလဲ ဆိုတဲ့ အကြောင်း အမေးခံလိုက်ရတဲ့ အခါမှာတော့ ဆိုးလ်ရှားက မဖြေပဲ ဟာသလုပ်ခဲ့လိုက်ပါတယ် ။
” သေချာတာပေါ့ ၊ အသင်းဆီ ရောက်လာကြတဲ့ ကစား သမားတိုင်းက သူတို့ရဲ့ အကြောင်းကို မိတ်ဆက် ပေးကြရတယ်လေ ။ သူရဲ့ နာမည်ကိုတော့ လူတိုင်း သိချင်မှ သိကြမယ် မဟုတ်လား ? လောလောဆယ်တို့ သူတို့ အဲ့တာတွေ လုပ်ခဲ့ပြီးကြပါပြီ ” လို့ ဆိုးလ်ရှား က ဟာသလုပ်ခဲ့လိုက်တာပဲ ဖြစ်ပါတယ် ။
