လီဗာပူးလ်အသင်းနောက်ခံလူ ရောဘတ်ဆန်၏ခြေချင်းဝတ်ဒဏ်ရာမှာ ကြီးကြီးမားမားထိခိုက်မှု မရှိခဲ့သော်လည်း ရက်သတ္တ ပတ်အနည်းငယ်ခန့် အနားယူရမည်ဖြစ်ကြောင်း Sky Sports သတင်းဌာနက ဖော်ပြခဲ့သည်။
ရောဘတ်ဆန်၏ခြေချင်းဝတ်အရွတ်မှာ စုတ်ပြဲသွားခဲ့ခြင်းဖြစ်ပြီး ပရီးမီးယားလိဂ်ရာသီအစပိုင်း ပွဲစဉ်များကို လွဲချော်ဖွယ်ရှိနေကြောင်း သိရသည်။
စကော့တလန်လက်ရွေးစင် အသင်းခေါင်းဆောင် ရောဘတ်ဆန် (၂၇ နှစ်)သည် တနင်္ဂနွေနေ့က ဘီလ်ဘာအိုအသင်းနှင့်ကစား သည့် ခြေစမ်းပွဲတွင် ခြေချင်းဝတ်ဒဏ်ရာရရှိခဲ့ခြင်းဖြစ်ပြီး ပထမပိုင်းအပြီးတွင် လူစားလဲခဲ့ရသည်။
၎င်း၏ဒဏ်ရာကို တနင်္လာနေ့က Scan စစ်ဆေးမှုပြုလုပ်ခဲ့ပြီး ကြီးကြီးမားမား ထိခိုက်မှုမရှိခဲ့ဟု သတင်းများက ဖော်ပြခဲ့ကြသည်။
ယင်းအခြေအနေနှင့်ပတ်သက်ပြီး ရောဘတ်ဆန်က “မက်ဆေ့ချ်ပေးပို့ပြီး အားပေးခဲ့တဲ့လူတိုင်းကို ကျေးဇူးတင်ပါတယ်။ Scan စစ်ဆေးမှုအရတော့ အရမ်းကြီး ဆိုးရွားလွန်တာမျိုးတော့ မဟုတ်ပါဘူး။ ဒါပေမဲ့ အရွတ်တချို့ ပျက်စီးသွားခဲ့ပြီး ဒါကို ပြုပြင်ကုသဖို့တော့ လိုအပ်ပါတယ်။ ကျွန်တော်ကတော့ အမြန်ဆုံးသက်သာလာဖို့ နေ့စဉ်နေ့တိုင်း ကြိုးစားပမ်းစား လုပ်ဆောင်မှာပါ။ ဒါ ဟာ အသင်းကို အနှေးနဲ့ အမြန် ကူညီနိုင်အောင်ဖြစ်ပါတယ်”ဟု သူ၏ Twitter တွင် ရေးသားခဲ့သည်။
လီဗာပူးလ်နည်းပြဖြစ်သူ ယာဂန်ကလော့ပ်က “အန်ဒီ(ရောဘတ်ဆန်)နဲ့အတူ ကျွန်တော်တို့ ကံကေင်းခဲ့တယ်လို့ ယူဆပါတယ်။ ဒီဒဏ်ရာက ဆိုးဆိုးရွားရွားတောင် ဖြစ်သွားနိုင်ပါတယ်။ ဗီဒီယိုမှာတော့ သူက လမ်းတောင် ကောင်းကောင်းမလျှောက်နိုင်တော့ဘူး။ ဒါပေမဲ့ ကျွန်တော်တို့အနေနဲ့ ကံကောင်းခဲ့ပါတယ်။ သိပ်တော့ မကြာပါဘူး။ နိုင်ငံတကာရက်သတ္တပတ်မတိုင်မီ (စက်တင်ဘာလ အစောပိုင်း)နဲ့ နိုင်ငံတကာရက်သတ္တပတ်နောက်ပိုင်းပေါ့။ ကျွန်တော်လည်း သေချာမသိပါဘူး”ဟု ပြောကြားခဲ့သည်။
