ရီးရဲလ် နဲ့ ဘိုင်ယန်ကွင်းလယ်လူဟောင်း တိုနီခရူးစ်က စပိန်မြေကိုမပြောင်းခင် ယူနိုက်တက်နဲ့သဘောတူညီမှုရရှိခဲ့တယ်လို့ ထုတ်ဖော်ပြောကြားလိုက်ပါတယ်။ ဒါပေမယ့်လည်း မိုယက်စ်ကိုင်တွယ်နေစဉ်မှာ သဘောတူညီမှုရရှိခဲ့တာဖြစ်ပြီး ဗန်ဟားလ်ရောက်လာချိန်မှာတော့ အပြောင်းအရွှေ့က ပျက်ပြယ်ခဲ့တယ်လို့ သိရပါတယ်။
ကွင်းလယ်ပိုင်းအတွက် ယူနိုက်တက်ဟာ ဂျာမန်သားကို ခေါ်ယူဖို့ လုပ်ဆောင်ခဲ့ပေမယ့် ဗန်ဟားလ်က တားမြစ်ခဲ့တာဖြစ်ပါတယ်။ SPORTI နဲ့အင်တာဗျူးမှာ တိုနီခရူးစ်က “၂၀၁၄ တုန်းက ကျွန်တော် ရီးရဲလ်ကိုမပြောင်းခင် ယူနိုက်တက်နဲ့သဘောတူညီမှုရရှိခဲ့ပြီးပါပြီ။ ဘိုင်ယန်ကနေ ယူနိုက်တက်ကိုပြောင်းရွှေ့ဖြစ်တော့မှာပါ။
ဒါပေမယ့် အဲ့နောက်ပိုင်းမှာ မိုယက်စ်ကို ထုတ်ပယ်ပြီး ဗန်ဟားလ်ကို ယူနိုက်တက်က ခန့်အပ်လိုက်ပါတယ်။ အဆုံးသတ်မှာ ၂ ဦးစလုံးငြင်းဆန်ပြီး အပြောင်းအရွှေ့က ပျက်ပြယ်ခဲ့ပါတယ်”လို့ ဖြေကြားခဲ့ပါတယ်။
ယူနိုက်တက် နဲ့ အဆင်မပြေခဲ့တဲ့နောက် ရီးရဲလ်အသင်းက ကမ်းလှမ်းလာခဲ့ပြီး စပိန်မြေကိုပြောင်းရွှေ့ခဲ့ကာ အန်ဆယ်လော့တီနဲ့အတွဲညီခဲ့တာဖြစ်ပါတယ်။
“ကမ္ဘာ့ဖလားအစမှာတင် အန်ဆယ်လော့တီက ကျွန်တော့်ကိုဆက်သွယ်လာပါတယ်။ အဲ့တာနဲ့ ရီးရဲလ်ကိုပြောင်းဖြစ်ခဲ့တာပါ”လို့ ခရူးစ်က ထပ်လောင်းပြောကြားခဲ့ပါတယ်။
ဂျာမန်သားဟာ ရီးရဲလ်အသင်းနဲ့အတူ ချန်ပီယံလိဂ် ၅ ကြိမ်ရယူနိုင်ခဲ့ပြီး ကလပ်ကမ္ဘာ့ဖလား ၅ ကြိမ် ၊ ယူအီးအက်ဖ်အေစူပါဖလား ၄ ကြိမ် ၊ လာလီဂါ ၄ ကြိမ် ၊ ကိုပါဒယ်ရေး ၁ ကြိမ် နဲ့ စပိန်စူပါဖလား ၄ ကြိမ်ရယူနိုင်ခဲ့ပါတယ်။
ဒါ့အပြင် တိုနီဟာ ရီးရဲလ်ကွင်းလယ်မှာ မိုဒရစ် ၊ ကက်စ်မဲရိုးနဲ့အတူ ဆယ်စုနှစ်တစ်ခုကြာအောင် အတွဲညီခဲ့တာဖြစ်ပါတယ်။ ဆုဖလားအောင်မြင်မှုတွေရယူနိုင်ခဲ့ပြီးနောက် ဂျာမန်သားဟာ ယူရို ၂၀၂၄ အပြီးမှာ ကစားသမားဘဝကနေ အနားယူခဲ့ပါတယ်။
ရီးရဲလ်ကတော့ တိုနီမရှိတဲ့ကွင်းလယ်မှာ ဗယ်လ်ဗာဒီ ၊ ကာမာဗင်ဂါ ၊ ချူအာမီနီတို့နဲ့ အစားထိုးထားခဲ့ပါတယ်။ လာမယ့်တနင်္ဂနွေနေ့မှာ ရီးရဲလ်ဟာ မက်ဒရစ်ဒါဘီအဖြစ် တီကိုအသင်းနဲ့ရင်ဆိုင်ရမှာဖြစ်ပါတယ်။
