ယူရိုပါလိဂ်ပြိုင်ပွဲ ဗိုလ်လုပွဲအပြီး ဖြစ်ရပ်နှင့်ပတ်သက်ပြီး ရိုးမားအသင်းနည်းပြ မော်ရင်ဟိုကို ဥရောပဘောလုံးအဖွဲ့ချုပ် (UEFA)က စွဲချက်တင်ထားသော်လည်း ဒိုင်လူကြီး၏ပွဲပြီး အစီရင်ခံစာကို ကြည့်ရှုသုံးသပ်ပြီးမှသာ ပြစ်ဒဏ်ချမှတ်မည်ဖြစ်ကြောင်း သိရသည်။
မော်ရင်ဟိုသည် ယူရိုပါလိဂ် ဗိုလ်လုပွဲအပြီးတွင် ဒိုင်လူကြီး အန်သိုနီတေလာကို ဝေဖန်ခဲ့သောကြောင့် UEFA က စွဲချက်တင်ခဲ့ခြင်းလည်း ဖြစ်သည်။ မော်ရင်ဟိုသည် ပွဲကစားနေစဉ် အဝါကတ်ပြခံခဲ့ရပြီး ပွဲအပြီး သတင်းစာရှင်းလင်းပွဲတွင် ဒိုင်လူကြီး အန်သိုနီတေလာကို ဝေဖန်ပြစ်တင်ခဲ့သည်။
ထို့ပြင် မော်ရင်ဟိုသည် ကွင်းမှ ပြန်လည်ထွက်ခွာစဉ် ကားပါကင်၌ အန်သိုနီတေလာကို နှစ်ကြိမ်တိုင် ဆဲဆိုခဲ့သည့် ဗီဒီယိုဖိုင်မှာ လူမှုမီဒီယာများတွင် ထွက်ပေါ်လျက်ရှိသောကြောင့် UEFA က ၎င်းအား စွဲချက်တင်ခဲ့ခြင်းဖြစ်သည်။
အန်သိုနီတေလာသည် ဘူဒါပက်စ်လေဆိပ်တွင်လည်း ရိုးမားအသင်းပရိသတ်များ၏ အော်ဟစ်ရန်ရှာမှု ခံခဲ့ရပြီး လုံခြုံရေး အစောင့်အရှောက်များဖြင့် ထွက်ခွာခဲ့ရသောကြောင့် UEFA က အဆိုပါလုပ်ရပ်ကိုရှုတ်ချကြောင်း ကြေညာချက် ထုတ်ပြန်ခဲ့သည်။
ယင်းပွဲ၌ နှစ်သင်းပေါင်း အဝါကတ် (၁၃) ကြိမ်ပြသခဲ့ရပြီး ယူရိုပါလိဂ်ပွဲစဉ်များတွင် စံချိန်ဖြစ်ခဲ့သလို ရိုးမားကစားသမားများ ပြသခံရသည့် (၇)ကတ်မှာလည်း ဗိုလ်လုပွဲအတွက် စံချိန်တင်အရေအတွက်ဖြစ်သည်။
UEFA သည် နှစ်ဖက်အသင်း ကစားသမားများနှင့် ပရိသတ်များ၏ လုပ်ရပ်အတွက် နှစ်သင်းစလုံးကို စွဲချက်များ တင်ထားပြီး ဒဏ်ကြေးအပါအဝင် အခြားပြစ်ဒဏ်များ ကျခံရဖွယ်ရှိနေကြောင်း သတင်းများက ခန့်မှန်းရေးသားခဲ့သည်။
