စီးရီးအေကလပ် ဂျူဗင်တပ်စ်အသင်းသည် လာမည့် ၂၀၂၁-၂၂ ရာသီအတွက် ရာသီကြိုပြင်ဆင်မှုများကို ဇူလိုင် (၁၄၊ ၁၅) ရက်များတွင် စတင်မည်ဖြစ်ပြီး အသင်း၏ လေ့ကျင့်ရေးကွင်းဖြစ်သော Continassa တွင် လေ့ကျင့်မှုများ ပြုလုပ်သွားမည်ဖြစ်ကြောင်း သိရသည်။
ဂျူဗင်တပ်စ်အသင်းသည် ပြီးခဲ့သည့် ၂၀၂၀-၂၁ ရာသီကုန်ဆုံးချိန်တွင် နည်းပြ ပီယာလိုနှင့် လမ်းခွဲပြီး နည်းပြသစ်အဖြစ် အသင်း၏နည်းပြဟောင်းjဖစ်သူ အယ်လီဂရီအား တစ်ကျော့ပြန် တာဝန်ယူစေခဲ့သည်။
အယ်လီဂရီသည် ဂျူဗင်တပ်စ်အသင်းအား လာမည့် ဇူလိုင် (၁)ရက်နေ့မှစတင်ကာ တရားဝင်ကိုင်တွယ်မည်ဖြစ်ပြီး ရာသီသစ်ပြင်ဆင်မှုများကို ဇူလိုင်လလယ်တွင်ပြုလုပ်နိုင်ရန် စီစဉ်ခဲ့ခြင်းဖြစ်သည်။
ဂျူဗင်တပ်စ်အသင်းအနေဖြင့် ရာသီသစ်ပြင်ဆင်မှုတွင် ခြေစမ်းပွဲ (၃) ပွဲမှ (၄)ပွဲခန့်အထိ ကစားသွားမည်ဖြစ် ပြီး အီတလီနှင့် ဥရောပတွင်သာ ယှဉ်ပြိုင်ကစားသွားမည်ဖြစ်သည်။
ယူရို-၂၀၂၀ ပြိုင်ပွဲနှင့် ကိုပါအမေရိကပြိုင်ပွဲတို့တွင် ဝင်ရောက်ယှဉ်ပြိုင်ခဲ့သည့် ဂျူဗင်တပ်စ်ကစားသမားများအနေဖြင့် လက်ရွေးစင်အသင်းမှ ထွက်ခွာပြီး (၂)ပတ်အတွင်း အသင်းနှင့် လေ့ကျင့်ရေးအစီအစဉ်များတွင် ပူးပေါင်းပါဝင်ရမည်ဖြစ်ကြောင်းလည်း သိရသည်။
ထို့ပြင် နည်းပြ အယ်လီဂရီအနေဖြင့် ရာသီကြိုလေ့ကျင့်ရေး အစီအစဉ်များ စတင်ပြီးမှသာ ကစားသမားသစ်ခေါ်ယူမှုများကို ပြုလုပ်ဖွယ် ရှိနေသည်။
ဂျူဗင်တပ်စ်အသင်းသည် လာမည့်ရာသီတွင် စီးရီးအေချန်ပီယံဆုအား ပြန်လည်ရယူရန် ပစ်မှတ်ထားနေသလို၊ ချန်ပီယံလိဂ်တွင် အောင်မြင်မှုရယူလိုနေကြောင်း သိရသည်။
