မန်ချက်စတာ ယူနိုက်တက် အသင်းရဲ့ အသင်းခေါင်းဆောင်သစ် ဘရူနို ဖာနန်ဒက်စ် ဟာ လက်ရှိ အသင်းရဲ့ ပုံစံကောင်းတွေ အပေါ် ဝမ်းမြောက် ပျော်ရွှင်မိကြောင်း နဲ့ ရာသီကြိုက ပုံစံတွေကို ဘောလုံး ရာသီသစ်ဆီအထိ သယ်ဆောင် သွားနိုင်ဖို့ မျှော်လင့်ကြောင်းလည်း ထုတ်ဖော် ပြောဆိုခဲ့ ပါတယ် ။
ယူနိုက်တက် ဟာ ဒီကနေ့ နံနက်ပိုင်းတုန်းက အာဆင်နယ် အသင်းနဲ့ အမေရိကန် နိုင်ငံမှာ ခြေစမ်းပွဲ ကစားခဲ့ပြီး ၂-၀ နဲ့ အနိုင်ရရှိခဲ့ ပါတယ် ။
၂ သင်းစလုံးဟာ လူငယ် နဲ့ စီနီယာ ကစားသမားတွေကို ရောနှောပွဲထုတ် သွားခဲ့ပြီး ဖာနန်ဒက်စ် နဲ့ ဂျေဒန် ဆန်ချို တို့က ယူနိုက်တက် အတွက် ဂိုးတွေကို သွင်းယူပေး သွားခဲ့ ပါတယ် ။
အဆိုပါ ပွဲအပြီးမှာ ဆက်လက် ယှဉ်ပြိုင်တဲ့ ပင်နယ်တီ ပြိုင်ပွဲမှာလည်း ယူနိုက်တက် ကပဲ ထပ်မံ အနိုင် ရရှိခဲ့ပြန် ပါတယ် ။
ယူနိုက်တက် ဟာ အခုနှစ် နွေရာသီ ခြေစမ်းပွဲ ၃ ပွဲ ကစားအပြီးမှာ ၃ ပွဲ စလုံးကို အနိုင်ရရှိအောင် ကစားထားနိုင် ခဲ့ပါတယ် ။ ဇူလိုင် ၂၆ ရက်နေ့ မှာလည်း လိဂ်တူး ကို တန်းတက်လာတဲ့ ရက်ဆမ်း အသင်းနဲ့ ကစားရဦးမှာ ဖြစ်တာကြောင့် ယူနိုက်တက်တို့ နိုင်ပွဲဆက်ဖို့ သေချာသလောက် ရှိနေပါတယ် ။
“ပွဲကောင်း တပွဲပါ ။ လူတိုင်း နှစ်သက်ကြမယ်လို့ ထင်ပါတယ် ။ အာဆင်နယ် နဲ့ ကစားရတာက အမြဲတမ်း ခက်ခဲတဲ့ ပွဲတွေပါပဲ ။ ပွဲကောင်းတပွဲ ၊ လက်ရည်စမ်းပွဲတခုပါ ။ ကျွန်တော်တို့ ဘက်ကလည်း စိတ်ဓါတ်ကောင်းတွေ ပြပြီး အနိုင်ရအောင် ကစားနိုင်ခဲ့ပါတယ် ။ ဒါကမှ တကယ့် အရေးအကြီးဆုံး အရာပါ”
“အခုဆိုရင် ကျွန်တော်တို့ ( စီနီယာကစားသမား ) အတော်များများ ပွဲကစားချိန်တွေ ပြန်ရလာကြပါပြီ ။ ကစားပွဲတွေ နဲ့ ပြန်ထိတွေ့ လာကြပါပြီ ။ ပုံစံကောင်းတွေ ကို ပြန်ရယူနေပါပြီ ။ ဒီပုံစံကောင်းတွေကို ရာသီစတဲ့ အထိ သယ်ဆောင် သွားနိုင်ဖို့ အရေးကြီးပါတယ်”
“အသင်းအတွက် ဂိုးသွင်း နိုင်တယ်ဆိုတာ ဘယ်တော့ပဲ ဖြစ်ဖြစ် ဘယ်လို ပွဲမှာပဲ ဖြစ်ဖြစ် တကယ်ကောင်းတဲ့ ခံစားချက်ပါ ။ ကိုယ့် ယုံကြည်မှုတွေကို တိုးစေပါတယ် ။ ဒီပွဲဟာ ကျွန်တော့ အတွက်တော့ တကယ် အမှတ်တရပါ ။ မန်ချက်စတာ ယူနိုက်တက် အသင်းခေါင်းဆောင်အဖြစ် နဲ့ တရားဝင် ပထမဆုံး ကစားခွင့်ရခဲ့တဲ့ပွဲလေ ။ ဒါပေမယ့် အနိုင်ရလဒ်ကတော့ ဒီနေ့အတွက် အကောင်းဆုံးသော အရာပါပဲ” လို့ ဖာနန်ဒက်စ် က ပြောဆိုခဲ့ ပါတယ် ။
