ပရီးမီးယားလိဂ်ကလပ်အသင်းများဖြစ်ကြသော ချဲလ်ဆီးနှင့် နယူးကာဆယ်တို့သည် ဘာစီလိုနာအသင်း တောင်ပံကစားသမား ရာဖင်ဟာကို ပရီးမီးယားလိဂ်သို့ ခေါ်ယူချင်နေသည်။ ချဲလ်ဆီးသည် ပြီးခဲ့သည့် ဘောလုံးရာသီတွင် ရာဖင်ဟာက လိဒ်အသင်းမှ ထွက်ခွာရန် စဉ်းစားကတည်းက ၎င်းကို ခေါ်ယူချင်နေခြင်း ဖြစ်သည်။ သို့ရာတွင် ဘာဆာက ပေါင်သန်း ၅၀ ပေး၍ ရာဖင်ဟာကို လက်ဦးမှုယူက ခေါ်ယူသွားခြင်းဖြစ်သည်။
ရာဖင်ဟာသည် ဘာဆာသို့ရောက်ရှိလာပြီးနောက် အရေးပါသည့် ကစားသမားဖြစ်လာခဲ့သည်။ အသင်းအတွက်ပြိုင်ပွဲစုံ ၃၇ ပွဲပါဝင်ကစားရာတွင် ၉ ဂိုးသွင်းပေးနိုင်ခဲ့သည်။ ဘာစီလိုနာသည် အသက် ၂၆ နှစ်အရွယ်ရှိ ရာဖင်ဟာကို လာမည့်နွေရာသီတွင် ထုတ်ရောင်းရန်ရှိနေကြောင်း စပိန်မီဒီယာများက ဖော်ပြခြင်းဖြစ်သည်။
ချဲလ်ဆီးသည် ရာဖင်ဟာကို စိတ်ဝင်စားနေဆဲဖြစ်ပြီး နယူးကာဆယ်တိုက်စစ်ကို မြှင့်တင်လိုသည့် အက်ဒီဟောင်းကလည်း ၎င်းကို ခေါ်ယူချင်နေကြောင်း သတင်းများက ဆက်လက်ဖော်ပြသည်။ ဘာစီလိုနာသည် ငွေကြေးအကြပ်အတည်းကို ရင်ဆိုင်နေရပြီး လာမည့်ရာသီတွင် ကစားသမား အားဖြည့်လိုပါက ပေါင် ၁၇၈ သန်းကို အရင်ရအောင်ရှာရမည်ဟု လာလီဂါအဖွဲ့ချုပ်က သတိပေးခြင်းကို ခံထားရသဖြင့် ရှိရင်းစွဲကစားသမားများထဲမှ အချို့ကို ပြန်ရောင်းထုတ်ရန်စဉ်းစားလာရခြင်း ဖြစ်သည်။
အန်ဆူဖာတီနှင့်ဖရန်ကီဒီဂျောင်တို့ကိုလည်း ပရီးမီးယားလိဂ်ကလပ်များက စိတ်ဝင်စားနေသည်။ သို့ရာတွင် ၎င်းတို့က ဘာစီလိုနာတွင်သာ ဆက်နေလိုကြောင်း ထုတ်ပြောထားကြသည်။
