ဝက်စ်ဟမ်းအသင်းသည် ၎င်းတို့အသင်းကို ရလဒ်ကောင်းများရရှိအောင် စွမ်းဆောင်ပေးနေသည့် အသင်းနည်းပြ ဒေးဗစ်မွိုက်စ်အား သက်တမ်းတိုးစာချုပ် ချုပ်ဆိုရန် စီစဉ်နေကြောင်း သိရှိရသည်။
ဝက်စ်ဟမ်းအသင်းသည် ခရစ္စတယ်ပဲလေ့စ်အသင်းကို အနိုင်ရရှိခဲ့သည့်ပွဲအပြီးတွင် ဒေးဗစ်မွိုက်စ်ကို စာချုပ်သစ်ချုပ်ဆိုရန်အတွက် ဆွေးနွေး ခဲ့ပြီး နှစ်ရှည်စာချုပ်ချုပ်ဆိုသွားရန် စီစဉ်ခဲ့ကြောင်းလည်း သိရှိရသည်။
ဒေးဗစ်မွိုက်စ်၏ လက်ရှိစာချုပ်မှာ (၁၂)လသာ ကျန်ရှိတော့ပြီး၊ မူလစာချုပ်၏ သဘောတူညီမှုအရ နောက်ထပ် (၁)နှစ်သက်တမ်းတိုးခွင့်ရရှိထား ပြီးဖြစ်သည်။
သို့ရာတွင် ဝက်စ်ဟမ်းအသင်းကမူ မွိုက်စ်ကို နှစ်ရှည်စာချုပ်ချုပ်ဆိုရန် စိတ်ဝင်စားနေသည့်အတွက် စာချုပ်သစ်ချုပ်ဆိုရန် စီစဉ်နေခြင်းလည်းဖြစ်သည်။
ဝက်စ်ဟမ်းအသင်းသည် ဒေးဗစ်မွိုက်၏ လစာငွေကိုလည်း လက်ရှိရရှိနေသည်ထက် ပိုမိုပေးချေသွားမည်ဖြစ်ကြောင်း သိရှိရသည်။
ဒေးဗစ်မွိုက်စ်သည် နည်းပြဘဝတွင် အဲဗာတန်အသင်းကို နည်းပြခဲ့စဉ်က တစ်နှစ်လုပ်ခပေါင် (၁.၅)သန်း၊ မန်ယူအသင်းကို နည်းပြခဲ့စဉ်က တစ်နှစ် ပေါင် (၅.၂)သန်းနှင့် လက်ရှိ ဝက်စ်ဟမ်းအသင်းတွင် တစ်နှစ်ပေါင် (၂.၅)သန်းရရှိနေသူဖြစ်သည်။
စာချုပ်သစ် ချုပ်ဆိုရန် သဘောတူညီမှုရရှိပါက ဒေးဗစ်မွိုက်စ်သည် လက်ရှိလစာထက် ပေါင်(၁)သန်းပိုကာ ပေါင် (၃.၅) သန်းရရှိသွားမည်ဖြစ်ကြောင်းလည်း သိရှိရသည်။
