အေစီမီလန်အသင်း၏ အမှုဆောင်အရာရှိချုပ်ဖြစ်သူ ဂါဇီဒစ်က အသင်းနည်းပြ ပီအိုလီနှင့် ပြဿနာမရှိကြောင်းနှင့် မိမိအနေဖြင့် ပီအိုလီကို အပြည့်အဝထောက်ခံကြောင်း ပြောကြားခဲ့သည်။
အာဆင်နယ်အသင်းတွင် အမှုဆောင်အရာရှိချုပ်အဖြစ် ဆယ်စုနှစ်တစ်ခုကျော်ကြာ တာဝန်ယူဆောင်ရွက်ခဲ့သည့် ဂါဇီဒစ်သည် ၂၀၁၈ ဒီဇင်ဘာလတွင် အေစီမီလန်အသင်း အမှုဆောင်အရာရှိချုပ်ရာထူးကို ရယူခဲ့သူဖြစ်သည်။
၎င်းသည် အေစီမီလန်အသင်းတွင် အမှုဆောင်အရာရှိချုပ်ရာထူးကို ရယူပြီးနောက် ၂၀၂၁-၂၂ ရာသီအစပိုင်းတွင် အသင်းနည်းပြ ပီအိုလီအား ရာထူးမှ ထုတ်ပယ်ကာ နာမည်ကျော် ဂျာမန်လူမျိုးနည်းပြ ရန်းနစ်(လက်ရှိ သြစတြီးယားအသင်းနည်းပြ)ကို အသင်းနည်းပြအဖြစ် အစားထိုးခန့်အပ်ရန် စီစဉ်ခဲ့ဖူးကြောင်း သိရသည်။
ဂါဒီဇစ်အနေဖြင့် ယင်းကဲ့သို့ ကြိုးပမ်းခဲ့သော်လည်း ပီအိုလီသည် ပြီးခဲ့သည့် ၂၀၂၁-၂၂ ရာသီက စီးရီးအေချန်ပီယံဆုကို ရယူပေးနိုင်ခဲ့သည်။
သို့သော် ဂါဒီဇစ်အနေဖြင့် ရန်းနစ်ကိုခန့်အပ်ရန် ကြိုးပမ်းခဲ့ခြင်းကြောင့် နည်းပြ ပီအိုလီနှင့် ဆက်ဆံရေးအဆင်မပြေဖြစ်နေကြောင်း အီတလီမီဒီယာအချို့က ဖော်ပြခဲ့သည်။
သို့သော် ဂါဇီဒစ်က မိမိအနေဖြင့် ပီအိုလီကို ထောက်ခံကြောင်း ပြောကြားခဲ့ခြင်းဖြစ်သည်။
ဂါဒီဇစ်က ”ပီအိုလီက မော်ဒန်ဘောလုံးအကြောင်းကို နားလည်သူဖြစ်ပြီး အလုပ်ကို အာရုံစိုက်လုပ်ဆောင်သူလည်းဖြစ်ပါတယ်။ မီဒီယာတွေအနေနဲ့ ဖော်ပြတာတွေ အမျိုးမျိုးရှိပေမဲ့ ရလဒ်ကောင်းအောင်လုပ်ဖို့ပဲ ပီအိုလီကို တိုက်တွန်းခဲ့ပါတယ်။ သူက ကျွန်တော် ပြောတဲ့အတိုင်း လုပ်နိုင်ခဲ့ပါတယ်”ဟု ပြောကြားခဲ့သည်။
