အာဆင်နယ် အသင်းဟာ ဒီရာသီ ယူရိုပါလိဂ် အုပ်စု အဆင့် ပွဲစဉ်တွေအတွက် အပြီးသတ် လူစာရင်း ၂၅ ယောက် ကြေညာရာမှာ ဝါရင့် ကစားသမားတွေ ဖြစ်ကြတဲ့ ဆိုကရက်တစ် နဲ့ မီဆွတ် အိုဇေးလ် တို့ကို ချန်လှပ် ခဲ့ပါတယ် ။
အာဆင်နယ် နည်းပြ အာတီတာ က ယူရိုပါလိဂ် လူစာရင်းမှာ အိုဇေးလ် နဲ့ ဆိုကရက်တစ် တို့ကို ချန်လှပ်သွားမှာ ဖြစ်ကြောင်းကို ကာယကံရှင်တွေဆီ ပြောပြဖို့ ခက်ခက်ခဲခဲ ကြိုးစား ခဲ့ရကြောင်း ဖွင့်ဟ ပြောကြား လိုက်ပါတယ် ။
အာတီတာ က မန်စီးတီး နဲ့ ပွဲကြို အင်တာဗျူးမှာ ” လူစာရင်း မထုတ်ပြန်ခင် အချိန်မှာ ကျွန်တော် သူတို့နဲ့ မျက်နှာချင်းဆိုင် စကားပြောဖြစ် ခဲ့ပါတယ် ။ သူတို့ကို ချန်လှပ် ခဲ့ရတဲ့ အကြောင်းအရင်း နဲ့ ပတ်သက်ပြီး သေချာ ရှင်းပြ ခဲ့ရပါတယ် ။ “
” သူတို့ကို ဒီလို ပြောပြဖို့ အတော်လေး ခက်ခဲ ခဲ့တာပါ ၊ ဒါပေမယ့် ကန့်သတ်ချက်တွေ စည်းမျဉ်းစည်းကမ်းတွေ ရှိနေတာ ကြောင့် မပြောမဖြစ် ပြောပြ ခဲ့ရပါတယ် ။ “
” ကျွန်တော်တို့ အနေနဲ့ အခု ဆုံးဖြတ်ချက်ကို လေးစား လိုက်နာဖို့ လိုအပ်ပါတယ် ၊ အခု လက်ရှိ အချိန်မှာ အသင်းကို အထောက်အကူ ပြုဖို့ရာ အကောင်းဆုံး နည်းလမ်း နဲ့ ကြိုးစား လေ့ကျင့် သွားရမှာပါ ၊ ဒီဇင်ဘာ မှာ ဘာတွေ ဆက်ဖြစ်မလဲ ဆိုတာ ဆက်လက် စောင့်ကြည့် ရမှာပါ ။ ” လို့ ပြောကြား သွားခဲ့ပါတယ် ။
အာဆင်နယ် အသင်း နည်းပြ မီခေးလ် အာတီတာ ဟာ ပြီးခဲ့တဲ့ မတ်လ နောက်ပိုင်းကတည်းက အိုဇေးလ် ကို တရားဝင် ပြိုင်ပွဲတွေမှာ အသုံးပြုခြင်း မရှိတော့သလို ပရီးမီးယားလိဂ် ပြိုင်ပွဲ လူစာရင်းကနေလည်း ချန်လှပ် ခံရဖို့ ရှိနေတယ်လို့ သတင်းတွေ ထွက်နေပါတယ် ။
အာဆင်နယ် အသင်း တိုက်စစ်မှူးဟောင်း ကီဗင်ကမ်းဘဲလ် ကတော့ အိုဇေးလ် ဟာ ဒီရာသီမှာ အသင်း အတွက် ထပ်မံ ကစားခွင့် ရတော့မှာ မဟုတ်ကြောင်း သုံးသပ် ပြောကြား လိုက်ပါတယ် ။
” ဒီရာသီမှာ အိုဇေးလ် ဟာ အာဆင်နယ် အတွက် ထပ်မံ ကစားခွင့် ရလိမ့်မယ်လို့ ကျွန်တော်တော့ မထင်ပါဘူး ၊ နောက်ထပ် ဘယ်တော့မှ ကစားခွင့် ရတော့မှာ မဟုတ်ပါဘူး ။ အကြောင်းအရင်း ခိုင်ခိုင်လုံလုံ ရှိပါတယ် ၊ သူက အသင်းကို ဆန့်ကျင် ခဲ့ပါတယ် ၊ ဒါကြောင့် သူ အသင်းမှာ ပြန်ပါခွင့်ရဖို့ မမြင်မိပါဘူး ။ “လို့ ပြောကြား သွားခဲ့ပါတယ် ။
