ဂျာမနီ ဂန္တဝင် ကစားသမား ဖြစ်သူ အန်ဒရီရက် ဘရာမီက ယူရိုပါလိဂ် ပြိုင်ပွဲရဲ့ ကွာတားဖိုင်နယ် အဆင့်ကို တက်ရောက် နိုင်ခဲ့တဲ့ အသင်းတွေ ထဲမှာ မန်ချက်စတာ ယူနိုက်တက် အသင်းထက် ပိုမို ကောင်းမွန်တဲ့ အသင်း ၂ သင်း ရှိတယ်လို့ ဆိုလိုက် ပါတယ်။ အိုလီဂန်နာ ဆိုးရှား ရဲ့ အသင်းဟာ ပြီးခဲ့တဲ့ ၁၆ သင်း ရှုံးထွက် အဆင့်မှာ သြစတီးယား ကလပ် LASK အသင်းကို နှစ်ကျော့ပေါင်း ၇-၁ နဲ့ အနိုင်ယူကာ နောက်ဆုံး ၈ သင်း အဆင့်ကို တက်ရောက် လာခဲ့ ပါတယ်။
ကွာတားဖိုင်နယ် အဆင့်မှာတော့ မန်ယူနိုက်တက်ဟာ ဒိန်းမတ် ကလပ် ကိုပင်ဟေဂင် အသင်းနဲ့ တွေ့ဆုံမှာ ဖြစ်ပါတယ်။ အခြား ကွာတားဖိုင်နယ် ပွဲစဉ်တွေ ကတော့ အင်တာမီလန် VS လေဗာကူဆင် ၊ ရှက်တာဒိုးနက် VS ဘေဆယ် နဲ့ ဝုဖ် VS ဆီဗီလာ စတဲ့ ပွဲစဉ်တွေ ဖြစ်ကြ ပါတယ်။
လွန်ခဲ့တဲ့ ၁၉၈၈ ကနေ ၁၉၉၂ ခုနှစ်ထိ အင်တာမီလန် အသင်းမှာ ကစား ပေးခဲ့သူ ဘရာမီက သူ့ရဲ့ အသင်းဟောင်းနဲ့ လေဗာကူဆင် တို့ဟာ ကွာတားဖိုင်နယ်ကို တက်ရောက် လာခဲ့တဲ့ အသင်း ၈ သင်းထဲမှာ အကောင်းဆုံးလို့ ဆိုလိုက်ပြီး ဒီနှစ်သင်းထဲက ဘယ်အသင်းပဲ ဆီမီးဖိုင်နယ်ကို တက်ရောက် လာခဲ့သည် ဖြစ်စေ မန်ယူနိုက်တက်ကို အနိုင်ယူ နိုင်စွမ်း ရှိတယ်လို့ ပြောလိုက် ပါတယ်။
အင်တာ OR လေဗာကူဆင်? ဘယ်အသင်း ကွာတားဖိုင်နယ် အဆင့်ကို ကျော်ဖြတ် သွားနိုင်မလဲ ဆိုတဲ့ မေးခွန်းကို ဘရာမီက ယခုလိုပဲ ပြောသွား ခဲ့ပါတယ်။
ဘရာမီက “ကျွန်တော် ကတော့ အင်တာမီလန် ကိုပဲ ရွေးချယ် သွားမှာ ဖြစ်ပါတယ်။ ဒါကို သံသယ ဖြစ်စရာ မရှိပါဘူး။ ဘေယာလေဗာကူဆင်ဟာ ကိုင်ဟားဗက်လို ထူးချွန်တဲ့ တိုက်စစ် ကစားသမား တစ်ဦးကို ပိုင်ဆိုင် ထားတဲ့ အပြင် တောင့်တင်းတဲ့ အသင်း တစ်သင်း ဖြစ်ပေမယ့်လည်း အင်တာမီလန် က တအားကို ကောင်းတဲ့ အသင်း ဖြစ်ပါတယ်။ ကွန်တီရဲ့ အသင်းက သာပါတယ်။
ကျွန်တော် ပြောချင်တာ ကတော့ ဒီပွဲမှာ ဘယ်အသင်းပဲ အနိုင်ရသည် ဖြစ်စေ ယူရိုပါလိဂ် ဖလားကို ဗိုလ်စွဲ နိုင်ဖို့ အရမ်း ကောင်းတဲ့ အခွင့်အရေး ရှိပါတယ်။ ဒီအဆင့်ကို ကျော်ဖြတ် နိုင်ခဲ့တဲ့ အသင်းဟာ ဆီမီးဖိုင်နယ် အဆင့်မှာ ရှက်တာဒိုးနက် ဒါမှမဟုတ် ဘေဆယ် နဲ့ ရင်ဆိုင် ရမှာ ဖြစ်ပြီး အနိုင်ရဖို့ အခြေအနေ ကောင်းပါတယ်။
အခြား တစ်ဖက် မှာ ဆိုရင် မန်ယူနိုက်တက်ဟာ ဖိုင်နယ်ကို တက်ရောက် လာနိုင်ပါတယ်။ ဒါပေမယ့် အင်တာကော ဘေယာ တို့ဟာ အင်္ဂလန် ကလပ်ထက် ပိုမို ကောင်းမွန် ကြပါတယ်။” လို့ ဆိုလိုက်ပါတယ်။
ယူနိုက်တက် ဂန္တဝင် ပေါလ်စခိုးလ် ကလည်း သူ့ရဲ့ အသင်းဟောင်းဟာ ဖိုင်နယ် အဆင့်မှာ အင်တာမီလန် နဲ့ တွေ့ဆုံဖို့ များတယ်လို့ ခန့်မှန်း လိုက်ပြီး အန်တိုနီယို ကွန်တီရဲ့ အသင်းဟာ ယူနိုက်တက်ရဲ့ ချန်ပီယံ အိမ်မက်ကို ခြိမ်းခြောက် နိုင်စွမ်း ရှိတဲ့ တစ်ခုတည်းသော အသင်းလို့ ဆိုထား ခဲ့ပါတယ်။
စခိုးလ်က “ယူရိုပါလိဂ် ပြိုင်ပွဲဟာ အခု ဆိုရင် ယူနိုက်တက် အတွက် ဖလား ရယူနိုင်ဖို့ ကြီးမားတဲ့ အခွင့်အရေးပါ။ ယူနိုက်တက်ရဲ့ ယူရိုပါလိဂ် ဖလား အိမ်မက်ကို အကြီးမားဆုံး ခြိမ်းခြောက် နိုင်စွမ်း ရှိတဲ့ အသင်း ကတော့ အင်တာမီလန်ပဲ ဖြစ်ပါတယ်။ သူတို့ဟာ ယူနိုက်တက် နဲ့ တန်းတူ ပြိုင်ပွဲမှာ ကျန်နေတဲ့ အကောင်းဆုံး အသင်းလို့ ကျွန်တော် ထင်ပါတယ်။
ဒီနှစ်သင်း ဖိုင်နယ်မှာ တွေ့ဆုံ ခဲ့မယ် ဆိုရင် အရမ်းကို ကောင်းတဲ့ ဖိုင်နယ် ဖြစ်လာ လိမ့်မယ်လို့ ကျွန်တော် ထင်ပါတယ်။ ကျွန်တော်တို့ အားလုံး ရင်ခုန် နေရမယ့် ဖိုင်နယ်ပါ။ နှစ်သင်းစလုံးမှာ တွန်းအားတွေ ရှိနေပြီး လူကာကူ ဆိုရင်လည်း အိုးထရပ်ဖို့ဒ် ကနေ ထွက်ခွာ ခဲ့ရတဲ့ ပုံစံကြောင့် ဒါဟာ ကြီးမားတဲ့ ပုံပြင် တစ်ခုပါပဲ။ ဒါပေမယ့် ယူနိုက်တက် တို့ ပုံစံကောင်းမှာ ရှိနေပြီး ၊ မှန်ကန်တဲ့ စိတ်ဓာတ် နဲ့ လန်းဆန်းမှု ရှိနေမယ် ဆိုရင်…ပြီးတော့ ယူနိုက်တက်ဟာ အင်တာထက် ကစားသမား အင်အားမှာ ပိုမို သာလွန်ပါတယ်။ သူတို့ ဖိုင်နယ်မှာ အင်တာကို ကျော်ဖြတ် နိုင်မယ်လို့ ကျွန်တော် ထင်ပါတယ်။ ကွာတားမှာ တွေ့ဆုံမယ့် ကိုပင်ဟေဂင်ဟာ သူတို့ အတွက် ပြသနာ မရှိဘူးလို့ ကျွန်တော် ထင်ပါတယ်။” လို့ ဆိုသွား ပါတယ်။
