ယူရိုပါလိဂ်ပွဲမတိုင်မီ လက်စတာဂိုးသမား ကက်စပါရှမိုက်ကယ်အား လှောင်ပြောင်ခဲ့သောဗီဒီယိုအတွက် စပါတာပရပ်ဂ်အသင်း ပြန်တောင်းပန်

လက်စတာအသင်း၏ ဒိန်းမတ်လက်ရွေးစင်ဂိုးသမားကက်စပါရှမိုက်ကယ်သည် အလွန်ဝနေပြီး ဝိတ်တက်နေကြောင်း၊ ၎င်းအနေဖြင့် ဘောလုံးပွဲများကစားရာတွင် (အဝလွန်သည့်မိန်းကလေးများ ဝတ်ဆင်လေ့ရှိသည့်) ကိုယ်ကျပ်အင်္ကျီကိုပင် ဝတ်ဆင်ပြီးကစားနေရကြောင်း အစီအစဉ်တင်ဆက်သူ သတင်းထောက် ယီရီဟိုဇက်က လှောင်ပြောင်ပြောကြားခဲ့ခြင်းဖြစ်သည်။

ချက်ကလပ် စပါတာပရပ်ဂ်အသင်းတာဝန်ရှိသူများသည် အင်္ဂလန်ကလပ် လက်စတာအသင်း၏ ဂိုးသမား ကက်စပါရှမိုက်ကယ်အား လှောင်ပြောင်ခဲ့သောဗီဒီယိုအတွက် ပြန်လည်တောင်းပန်ခဲ့ကြောင်း သိရသည်။

ယူရိုပါလိဂ်ပွဲစဉ် စပါတာပရပ်ဂ်-လက်စတာပွဲမတိုင်မီ စပါတာပရပ်ဂ်အသင်းသည် ၎င်းတို့၏ YouTube ဗီဒီယို၌ ပြိုင်ဘက်လက်စတာအသင်းအကြောင်းကို ဖော်ပြခဲ့သည်။

ယင်းကဲ့သို့ ဖော်ပြရာ၌ လက်စတာအသင်း၏ ဒိန်းမတ်လက်ရွေးစင်ဂိုးသမားကက်စပါရှမိုက်ကယ်သည် အလွန်ဝနေပြီး ဝိတ်တက်နေကြောင်း၊ ၎င်းအနေဖြင့် ဘောလုံးပွဲများကစားရာတွင် (အဝလွန်သည့်မိန်းကလေးများ ဝတ်ဆင်လေ့ရှိသည့်) ကိုယ်ကျပ်အင်္ကျီကိုပင် ဝတ်ဆင်ပြီးကစားနေရကြောင်း အစီအစဉ်တင်ဆက်သူ သတင်းထောက် ယီရီဟိုဇက်က လှောင်ပြောင်ပြောကြားခဲ့ခြင်းဖြစ်သည်။

ယင်းဗီဒီယိုထွက်ပေါ်လာပြီးနောက် လက်စတာအသင်းပရိသတ်များမှာ ဒေါသထွက်ခဲ့ကြပြီး လူမှုကွန်ရက်များတွင် တုံ့ပြန်ဝေဖန်ခဲ့ကြသည်။

ယင်းအကြောင်းအရာနှင့်ပတ်သက်၍ စပါတာပရပ်ဂ်အသင်းဥက္ကဋ္ဌ ယာရိုဆလပ်ဗ်ဗာဒစ်ကိုယ်တိုင်က ပြန်လည်တောင်းပန်ခဲ့ပြီး အသင်း၏ Twitter တွင်လည်း ကြေညာချက်ထုတ်ပြန်ကာ တောင်းပန်ခဲ့သည်။

၎င်းတို့၏တောင်းပန်မှုတွင် လက်စတာအသင်းအတွက် ပြိုင်ပွဲစုံ ပွဲ(၄၀၀)ကျော်ကစားထားသည့် အသက်(၃၄)နှစ်အရွယ် ကက်စပါရှမိုက်ကယ်၏ စွမ်းဆောင်ရည်များကို ပြန်လည်ချီးကျူးခဲ့ပြီး လက်စတာအသင်းအပေါ်လည်း လေးစားမှုထားရှိကြောင်း ဖော်ပြခဲ့သည်။