မန်ချက်စတာ ယူနိုက်တက် အသင်းရဲ့ တိုက်စစ်မှူးဟောင်း နှစ်ဦး ဖြစ်ကြတဲ့ ဒီမစ်တာ ဘာဘာတော့ဗ်နဲ့ အိုဝင် ဟားဂရေ့ဗ် တို့က လက်ရှိ အသင်းမှ ကွင်းလယ် တိုက်စစ် ကစားသမား ဖြစ်သူ ဂျက်စီ လင်ဂတ်ကို အိုးလ် ထရပ်ဖို့ဒ် မှ ထွက်ခွာဖို့ ကိုယ်စီ တိုက်တွန်း နှိုးဆော် သွားခဲ့လိုက်ကြ ပါတယ် ။
ဂျက်စီ လင်ဂတ် ဆိုတာ မန်ချက်စတာ ယူနိုက်တက် အသင်း ရဲ့ အကယ်ဒမီမှ ထွက်ပေါ်လာခဲ့တဲ့ ကစားသမား တစ်ဦး ဖြစ်ပြီး လွန်ခဲ့တဲ့ 18 လတာ အချိန် ကာလ အတွင်း မှာတော့ ပုံမှန် ပွဲထွက် ကစားခွင့် တွေကို ပိုင်ဆိုင် နိုင်ဖို့ အတော်လေး ရုန်းကန် နေခဲ့ ရသူပဲ ဖြစ်ပါတယ် ။
အထူးသဖြင့် ယူနိုက်တက် အသင်းဆီ ဘရူနို ဖာနန်ဒက်စ် ရောက်ရှိ လာခဲ့တဲ့နောက် သူဟာ အသင်း ရဲ့ အရံ ကစားသမား စာရင်းထဲတောင် ပါဝင်ဖို့ ရုန်းကန် ခဲ့ရ ပါတယ် ။ လက်ရှိ ဘောလုံး ရာသီ မှာလည်း သူဟာ အသင်း အတွက် ပြိုင်ပွဲစုံ 3 ကြိမ်သာ ပါဝင် ကစားခွင့် ပိုင်ဆိုင် ထားနိုင်ခဲ့ ပါတယ် ။
အဲ့တာတွေ ကလည်း ပြည်တွင်း လိဂ် ဖလား ပြိုင်ပွဲ တွေမှာပဲ ကစားခွင့် ပိုင်ဆိုင် နိုင်ခဲ့တာပဲ ဖြစ်ပါတယ် ။ ယူနိုက်တက် အသင်းဆီ ဆိုးလ်ရှား စတင် ရောက်ရှိ ခဲ့စဉ် တုန်းကတော့ သူဟာ ပုံစံကောင်း အချို့ ပြသ ထားနိုင်ခဲ့ပေမယ့် အခုတော့ ရှားရှားပါးပါး ပွဲထွက်ခွင့်ရတဲ့ အချိန်တွေမှာတောင် ရုန်းကန် နေခဲ့ရ ပါတယ် ။
အခြား တစ်ဖက် မှာတော့ သူ့ကို ခေါ်ယူဖို့အတွက် နယူးကာဆယ် ၊ အင်တာ မီလန် နဲ့ ဆဲလ်တစ် အသင်း တွေက စိတ်ဝင်စား နေကြတယ်လို့ သိရ ပါတယ် ။ အခုတော့ ဘာဘာတော့ဗ် က လင်ဂတ် ကို အသင်း မှ ထွက်ခွာဖို့ အချိန်ကျပြီ ဖြစ်ကြောင်း တိုက်တွန်း နှိုးဆော် သွားခဲ့လိုက် ပါတယ် ။
” ရိုးရိုးသားသား ပြောရမယ် ဆိုရင် သူ့ရဲ့ အချိန်တွေ ကုန်ဆုံး သွားခဲ့ ပါပြီ ။ သူဟာ ကစားခွင့်တွေ မပိုင်ဆိုင်တော့ ပါဘူး ။ ဒီအတွက် သူဟာ အခွင့်အရေးတွေ ရရှိခဲ့ပါ သေးတယ် ။ သူဟာ ဘယ်လောက် ကောင်းလဲ ၊ ဘယ်လောက် အတိုင်းအတာ ထိ ကောင်းနိုင် သလဲ ဆိုတာ သက်သေပြဖို့ အချိန်တွေ ပိုင်ဆိုင်ခဲ့ ပါတယ် ”
” လက်ရှိ အနေအထားတွေ အရ အိုလီက သူ့ကို ပွဲထွက် ကစားခွင့်တွေ ပေးဖို့ ယုံကြည်မှု သိပ်မရှိဘူးလို့ မြင်တွေ့ နေရ ပါတယ် ။ ရိုးရိုးသားသား ပြောရမယ် ဆိုရင် လက်ရှိ အသင်းမှာ သူဟာ ဘယ် နေရာ ကစား ပေးနိုင်မလဲ ဆိုတာတောင် တွေးလို့ မရနိုင် ပါဘူး ”
” အကယ်လို့ ခင်ဗျားဟာ အသင်း တစ်သင်းမှာ အကြာကြီး ရှိနေခဲ့မယ် ၊ ပြီးတော့ အသက်လည်း 28 နှစ် ရောက်သွားပြီ ဆိုရင်တော့ နောက်ပြန် ကြည့်ပြီး ‘ ငါ လုံလောက်တဲ့ အောင်မြင်မှု ရခဲ့သလား ? လုပ်ခဲ့တဲ့ အရာတွေအတွက် ငါ ပျော်ရဲ့လား ? ငါ့ရဲ့ အချိန်တွေ ကုန်ဆုံး သွားပြီလား ? ‘ ဆိုတာ တွေကို တွေးရ ပါလိမ့်မယ် ”
” ဒါ့ကြောင့် လက်ရှိ အနေအထား တွေကို ခြုံငုံ သုံးသပ် ကြည့်လိုက်မယ် ဆိုရင် သူဟာ ပြောင်းရွှေ့ဖို့ လိုအပ် နေပြီ ၊ ပွဲထွက်ခွင့် တွေကို ရရှိ နိုင်မယ့် အသင်းဆီ ပြောင်းရွှေ့ သင့်ပြီ လို့ ကျွန်တော် ထင်မိ ပါတယ် ” လို့ ဘာဘာတော့ဗ် က သုံးသပ် သွားခဲ့လိုက် ပါတယ် ။ မိုက်ကယ် အိုဝင် ကတော့ …
” ကျွန်တော်နဲ့ ဘာဘာတော့ဗ် တို့ အသင်းမှာ ရှိခဲ့စဉ် တုန်းက သူ ( လင်ဂတ် ) ဟာ အကယ်ဒမီ ကနေ ပေါ်ထွက် လာခဲ့ ပါတယ် ။ သူ တိုးတက် လာခဲ့တာ ကျွန်တော်တို့ မြင်ခဲ့ကြ ပါတယ် ။ အခုတော့ သူဟာ အသက်တွေလည်း ကြီးလာခဲ့ ပါပြီ ။ သူ့ အနေနဲ့ ဒီလို အသက်အရွယ်မှာ ပုံမှန် ကစားခွင့် ရနိုင်မယ့် အသင်းဆီ ပြောင်းရွှေ့သင့် ပါပြီ ”
” သူဟာ ယူနိုက်တက် အသင်းမှာပဲ တချိန်လုံး ရှိနေခဲ့ ပါတယ် ။ ဒါ့ကြောင့် ယူနိုက်တက် ကစားသမား တစ်ဦး ဖြစ်ရတဲ့ ခံစားချက်က ဘာလဲဆိုတာ သူ ကောင်းကောင်း သိပါတယ် ။ အခု သူဟာ ဘဝအတွက် ၊ ပရော်ဖက်ရှင်နယ် ကစားသမား ဘဝအတွက် ဆုံးဖြတ်ချက် ချမှတ်ရမယ့် အချိန် ကျရောက် လာခဲ့ ပါပြီ ”
” သူ့ အနေနဲ့ ထိပ်တန်း အသင်း တစ်သင်းရဲ့ ကစားသမား ဖြစ်ချင်လား ၊ ဒါမှမဟုတ် အခြား အသင်း တစ်သင်းမှာ ပုံမှန် ပွဲထွက်ခွင့်ရတဲ့ ကစားသမား ဖြစ်ချင်လား ဆိုတာ ဆုံးဖြတ်ရမယ့် အချိန် ကျရောက် ပါပြီ ။ ဒါက သူ့အတွက် မျှတစွာ တွေးတောလို့ ရတဲ့ အနေအထား တစ်ရပ် ပါပဲ ”
” သူ့နေရာမှာ ကျွန်တော်သာ ဆိုရင် ၊ အခုလို ပွဲကစားခွင့်တွေကို ဆုံးရှုံး နေခဲ့ရမယ် ဆိုရင်တော့ ကျွန်တော်ဟာ အခြား အသင်းကို ပြောင်းရွှေ့ကောင်း ပြောင်းရွှေ့ပြီး ပွဲထွက် ကစားခွင့် တွေကို ပိုင်ဆိုင်ဖို့ ကြိုးစားဖြစ်မှာပါ ” လို့ ထုတ်ဖော် ပြောကြား သွားခဲ့လိုက် ပါတယ် ။
