ယူကရိန်းစစ်တပ်သို့ ဝင်ရောက်သွားခဲ့သည့် စတာကော့ဗ်စကီးအား ငွေကြေးအကူအညီနှင့် အခြားအကူအညီများပေးရန် ဂျိုကိုဗစ် ကမ်းလှမ်း

အငြင်းပွားစရာကိစ္စများကို ဖန်တီးလေ့ရှိသည့် ကမ္ဘာ့အဆင့် (၁) တင်းနစ်သမား ဂျိုကိုဗစ်သည် ယူကရိန်းစစ်တပ်သို့ စစ်မှုထမ်းရန် ဝင်ရောက်သွားခဲ့သည့် စတာကော့ဗ်စကီးအား ငွေကြေးအကူအညီနှင့် အခြားအကူအညီများပေးရန် ကမ်းလှမ်းခဲ့ကြောင်း သိရှိရသည်။

စတာကော့ဗ်စကီးသည် ၂၀၁၃ ဝင်ဘယ်လ်ဒန်အိုးပင်းတင်းနစ်ပြိုင်ပွဲတွင် ရော်ဂျာဖက်ဒါရာကို အနိုင်ရခဲ့ဖူးသည့် ကစားသမားဟောင်းတစ်ဦးဖြစ်ပြီး ပြီးခဲ့သည့် သြစတြေးလျအိုးပင်း တင်းနစ်ပြိုင်ပွဲအပြီးတွင် ကစားသမားဘဝမှ အနားယူခဲ့သူဖြစ်သည်။

ယခုအချိန်တွင် ရုရှားနိုင်ငံ၏ ကျူးကျော်မှုကို ရင်ဆိုင်နေရသည့် မိခင်နိုင်ငံအတွက် စစ်မှုထမ်းလျက်ရှိရာ ယူကရိန်းနိုင်ငံအား အကူအညီများ ပေးအပ်လျက်ရှိသည့် ဂျိုကိုဗစ်က ”မကြာခင် အချိန်အတွင်း အားလုံးအဆင်ပြေသွားမယ်လို့ ကျွန်တော် မျှော်လင့်ပါတယ်။ မင်းအနေနဲ့ ငွေကြေးအကူအညီပဲဖြစ်ဖြစ်၊ တခြားဘယ်အကူအညီပဲဖြစ်ဖြစ် လိုအပ်နေတယ်ဆိုရင် ငါသိပါရစေ”ဟု စာရေးသား၍ ပေးပို့ခဲ့ခြင်း ဖြစ်သည်။

ယူကရိန်းနိုင်ငံ၏ ကမ္ဘာကျော်အားကစားသမား အတော်များများသည် ယူကရိန်းနိုင်ငံတော်ကို ကာကွယ်ရန်အတွက် စစ်မှုထမ်းနေကြပြီး အိုလံပစ်ရွှေတံဆိပ်ရှင်လက်ဝှေ့သမား လိုမာချန်ကို၊ ကမ္ဘာ့ဟဲဗီးဝိတ်ချန်ပီယံ အူဆိုက်တို့လည်း ပါဝင်သည်။