ဘာစီလိုနာအသင်းခေါင်းဆောင် မက်ဆီသည် ယခုရာသီ လာလီဂါဂိုးသွင်းဘုရင်ဆု (ပီချီချီဆု)အား သွင်းဂိုး(၃၀)ဂိုးဖြင့် ရရှိခဲ့ပြီးနောက် ဥရောပထိပ်တန်းလိဂ် (၅)ခုတွင် အမှတ်ပေး ပြိုင်ပွဲ ရွှေဖိနပ်ဆုအများဆုံးရရှိသူအဖြစ် မှတ်တမ်းဝင်ခဲ့ကြောင်း စပိန်အားကစားသတင်းစာ Marca က ဖော်ပြခဲ့သည်။
အသက် (၃၃)နှစ်အရွယ်ရှိ အာဂျင်တီးနားတိုက်စစ်မှူး မက်ဆီသည် လာလီဂါဂိုးသွင်းဘုရင်ဆုအား (၈) ကြိမ်မြောက်ရရှိခြင်းဖြစ်ခဲ့ပြီး၊ ဘွန်ဒစ်လီဂါပြိုင်ပွဲ၏ ဂိုးသွင်းဘုရင်ဆုကို (၇) ကြိမ်ရရှိထားသည့် ဂျာမန်ဂန္ထဝင်တိုက်စစ်မှူး ဂတ်မူလာ၏ စံချိန်ကိုကျော်ဖြတ်ကာ စံချိန်မှတ်တမ်းသစ် ရေးထိုးနိုင်ခဲ့ခြင်းဖြစ်သည်။
မက်ဆီသည် ပီ ချီချီဆုအား ၂၀၀၉-၁၀ ရာသီတွင် ပထမဆုံးအကြိမ်ရရှိခဲ့ပြီး (၁၂)ရာသီ အကြာတွင် စံချိန်တင်နို်င်ခဲ့ခြင်းဖြစ်သည်။
ထို့ပြင် မက်ဆီသည် ၂၀၁၆- ၁၇ ရာသီမှစတင်ကာ ပြီးဆုံးခဲ့သည့် ၂၀၂၀-၂၁ ရာသီအထိ (၅)ရာသီဆက်တိုက် ပီချီချီဆုကို ရယူနိုင်ခဲ့ခြင်းဖြစ်ပြီး ယင်းမှာလည်း ဥရောပထိပ်တန်း လိဂ် (၅)ခုတွင် အမှတ်ပေးရွှေဖိနပ်ဆုအား အကြိမ်ဆက်တိုက် အများဆုံးရယူနိုင်သည့် မှတ်တမ်းဖြစ်ခဲ့သည်။
မက်ဆီနောက် အမှတ်ပေးရွှေဖိနပ်ဆု အား အကြိမ်ဆက်အများဆုံးရယူနိုင်သူမှာ ဘိုင်ယန်မြူးနစ်အသင်း၏ ပိုလန်တိုက်စစ်မှူး လီဝန်ဒေါစကီးဖြစ်ပြီး ပြီးဆုံးခဲ့သည့် ၂၀၂၀-၂၁ ရာသီ အပါအဝင် ဘွန်ဒစ်လီဂါ ဂိုးသွင်းဘုရင်ဆုကို (၄)ကြိမ်ဆက်ရယူနိုင်ခဲ့သည်။
မက်ဆီသည် ယခုရာသီ ဥရောပရွှေဖိနပ်ဆု (ESM)ဆုကို လွဲချော်ခဲ့သော်လည်း ယင်းဆု၏ အအောင်မြင်ဆုံးကစားသမားအဖြစ် (၆)ကြိမ်အထိရယူကာ စံချိန်တင်ထားသူဖြစ်သည်။
မက်ဆီ၏ အဓိကပြိုင်ဘက်ဖြစ်သည့် စီရော်နယ်လ်ဒိုမှာ အမှတ်ပေးပြိုင်ပွဲ ရွှေဖိနပ်ဆုအား မန်ယူနှင့် (၁)ကြိမ်၊ ရီးယဲလ်နှင့် (၃)ကြိမ်၊ ဂျူဗင်တပ်စ်နှင့် (၁)ကြိမ်ရရှိပြီး စုစုပေါင်း (၅)ကြိမ်ရရှိ ထားသည်။
