၂၀၂၃-၂၀၂၄ ရာသီ ပရီးမီးယားလိဂ်ပြိုင်ပွဲမှာ တစ်ရာသီလျှင် ၃၈ ပွဲယှဉ်ပြိုင်ကစားရသည့် ရာသီများအနက် ဂိုးအများဆုံးအဖြစ် စံချိန်သစ်တင်ခဲ့ပြီဖြစ်ကြောင်း သိရသည်။
ဧပြီ ၂၄ ရက်က ယှဉ်ပြိုင်ကစားသည့် ပွဲစဉ် ၂၉ ပွဲကျန် လေးပွဲအပြီးမှာပင် ယခုရာသီ ပရီးမီးယားလိဂ်ပြိုင်ပွဲ၏ သွင်းဂိုးစုစုပေါင်းမှာ ၁၀၉၂ ဂိုးရှိလာပြီး စံချိန်သစ်တင်ခဲ့ခြင်းဖြစ်သည်။
ပရီးမီးယားလိဂ်အမည်ဖြင့် စတင်ကျင်းပစဉ်က အသင်း ၂၂ သင်းပါဝင်ပြီး တစ်ရာသီလျှင် ပွဲစဉ် ၄၂ ပွဲယှဉ်ပြိုင်ကစားရသော်လည်း ၁၉၉၅-၁၉၉၆ ရာသီမှစတင်ကာ အသင်း ၂၀ သို့လျှော့ချ၍ တစ်ရာသီလျှင် ပွဲစဉ် ၃၈ ပွဲအဖြစ် ပြောင်းလဲကစားစေခဲ့သည်။
ယခင်က ဂိုးအများဆုံးအဖြစ် ပြီးခဲ့သည့် ၂၀၂၂-၂၀၂၃ ရာသီတွင် ၁၀၈၄ ဂိုးဖြင့် စံချိန်တင်ထားပြီး ယခုရာသီတွင်မူ လက်ကျန်ပွဲစုစုပေါင်း ၄၅ ပွဲကျန်ရှိချိန်မှာပင် ၁၀၉၂ ဂိုးဖြင့် စံချိန်သစ်တင်ခဲ့ခြင်းဖြစ်သည်။ ထို့ပြင် ဧပြီ ၂၅ ရက်တွင် မန်စီးတီးအသင်းက ဘရိုက်တန်အသင်းအား အဝေးကွင်း၌ လေးဂိုးပြတ် အနိုင်ရခဲ့ပြီးနောက် ယခုရာသီ သွင်းဂိုးစုစုပေါင်းမှာ ၁၀၉၆ ဂိုးအထိရှိလာပြီဖြစ်သည်။
ယခုရာသီတွင် ပွဲစဉ်တစ်ပွဲလျှင် တစ်ပွဲပျမ်းမျှ ၃ ဒသမ ၂၆ ဂိုးအထိ သွင်းယူထားခြင်းဖြစ်ပြီး ယင်းနှုန်းအတိုင်းဆက်သွားပါက ရာသီကုန်ချိန်တွင် သွင်းဂိုးအရေအတွက်မှာ ၁၃၀၀ ကျော်အထိရှိနိုင်ကြောင်း ခန့်မှန်းထားသည်။
