ယခုရာသီ ပရီးမီးယားလိဂ်ပြိုင်ပွဲတွင် သွင်းဂိုး(၂၀)ဂိုးအထိ တိုက်စစ်မှူး ရပ်ရှ်ဖို့ဒ် သွင်းယူနိုင်လိမ့်မည်ဟု မန်ယူနည်းပြ တန်ဟက်ဂ်က မျှော်လင့်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။
ရပ်ရှ်ဖို့ဒ်သည် ယခုရာသီ အမှတ်ပေးပွဲ (၆)ပွဲ ကစားထားရာတွင် (၃)ဂိုးသွင်းကာ (၂)ဂိုးဖန်တီးပေးခဲ့သည်။
တန်ဟက်ဂ်သည် စီရော်နယ်လ်ဒိုထက် ရပ်ရှ်ဖို့ဒ်ကို ပထမဦးစားပေးအဖြစ် ဆက်လက်အသုံးပြုသွားမည်ဟုလည်း အသင်းနှင့်နီးစပ်သူများထံမှ သိရသည်။
”မန်နေဂျာက မားကပ်စ်(ရပ်ရှ်ဖို့ဒ်)ကို ယူနိုက်တက်အသင်းရဲ့ နံပါတ်တစ်တိုက်စစ်မှူးအဖြစ်နဲ့ ဦးဆောင်စေဖို့ အလိုရှိနေပါတယ်။ မားကပ်စ်မှာ ကမ္ဘာ့အကောင်းဆုံးထဲက တစ်ဦးဖြစ်လာမယ့် အရည်အသွေးရှိတယ်လို့လည်း သူ ယုံကြည်နေတယ်။ ပွဲအတွင်းမှာ ကစားသမားကိုယ်တိုင် သက်သေပြဖို့လည်း နည်းပြက အလိုရှိနေပါတယ်။ အခွင့်အရေးတစ်ကြိမ်ရတိုင်း အမြန်နှုန်းနဲ့ ကျွမ်းကျင်မှုကို အသုံးချဖို့ နည်းပြက သူ့ကို အမြဲပြောလေ့ရှိပါတယ်။ ပြီးတော့ မားကပ်စ်ဟာ ဒီရာသီမှာ ဂိုး(၂၀)ကို လွယ်လွယ်ကူကူ သွင်းယူနိုင်မယ်လို့လည်း ပြောခဲ့ပါတယ်။ သူတို့အကြား ဆက်ဆံရေးက အရမ်းကောင်းနေပြီး မားကပ်စ်လည်း တကယ်ပျော်နေပါတယ်”ဟု သတင်းရင်းမြစ်တစ်ဦးက The Sun သို့ ပြောကြားခဲ့သည်။
၂၀၁၅-၁၆ ရာသီတွင် မန်ယူအသင်းနှင့် ပရီးမီးယားလိဂ်ပွဲဦးထွက်ခဲ့သည့် ရပ်ရှ်ဖို့ဒ်သည် ၂၀၁၉-၂၀ ရာသီတွင် လိဂ်သွင်းဂိုးအများဆုံးအဖြစ် (၁၇) ဂိုးအထိ သွင်းယူခဲ့သည်။
စီရော်နယ်လ်ဒို၏အခြေအနေနှင့်ပတ်သက်ပြီး အဆိုပါသတင်းရင်းမြစ်က ” ရော်နယ်လ်ဒို အရန်ခုံမှာ ထိုင်နေရင် ကစားသမားတွေက သူတို့ကိုယ်သူတို့ ယုံကြည်မှုရှိပါတယ်။ သူ ကွင်းထဲဝင်လာရင်တော့ အသင်းက ဖိအားများသွားတယ်။ ကစားသမားအားလုံးက သူ့ကို ချစ်ပါတယ်။ ဒါပေမဲ့ ရာသီကြိုမှာ သူမပါခဲ့လို့ အနှောင့်အယှက်ဖြစ်ခဲ့တယ်။ ရော်နယ်လ်ဒိုဟာ တန်ဟက်ဂ်ရဲ့နည်းစနစ်နဲ့ အလုပ်မဖြစ်ပါဘူး”ဟု ပြောကြားခဲ့သည်။
