ONE လိုက်ဟဲဗီးဝိတ်တန်း ကမ္ဘာ့ချန် ပီယံ အောင်လအန်ဆန်က ၂၀၂၁ ခုနှစ် အတွင်း သုံးပွဲမှ လေးပွဲအထိ ထိုးသတ်ခွင့်ရရန် မျှော်မှန်းထားပြီး ဒီရစ်ဒါကို အရှုံးပေးခဲ့ရသည့် Ground Fight ကို ပိုမိုလေ့ကျင့်နေကြောင်း BBC သတင်းဌာနနှင့် တွေ့ဆုံခဲ့သော အင်တာဗျူးတွင် ဖြေကြားခဲ့သည်။
အောင်လအန်ဆန်သည် ပြီးခဲ့သည့် အောက်တိုဘာလအတွင်း ယှဉ်ပြိုင်ထိုးသတ်ခဲ့သည့် ONE မစ်ဒယ်ဝိတ်တန်း ကမ္ဘာ့ချန်ပီယံ ကာကွယ်ပွဲတွင် နယ်သာလန်နိုင်ငံသား ဒီရစ်ဒါ၏ချုပ်ကွက်ကြောင့် ပထမအချီမှာပင် ရှုံးနိမ့်ပြီး ချန်ပီယံဆု လက်လွှတ်ခဲ့ရသည်။
သို့ဖြစ်ရာ အောင်လအန်ဆန်က “၂၀၂၁ မှာ လည်း ကိုယ့်ကိုယ်ကို ယုံကြည်မှုအပြည့် ရှိပါတယ်။ ဒီပြိုင်ဘက်နဲ့ပဲ ပြန်ကစားခွင့်ရမယ်လို့ ယုံကြည်တယ်။ ကျွန်တော့်ရဲ့ ချန်ပီယံဆုကိုလည်း သူ့ဆီကနေ ပြန်ယူနိုင်မယ်လို့ ယုံကြည်တယ်။ ဒီရစ်ဒါနဲ့ Rematch ချက်ချင်းပြန်ကစားရမယ်၊ မရဘူးဆိုတာကို ကျွန်တော်မသိဘူး။ ချန်ပီယံလုပွဲ ပြန်မကစားရခင် တစ်ပွဲအရင်ကစားရမယ်ဆိုရင်လည်း ကျွန်တော်ဂရုမစိုက်ပါဘူး။ ကျွန်တော်ဂရုစိုက်တာက ၂၀၂၁ မှာ သုံးပွဲ၊ လေးပွဲလောက် ကစားခွင့်ရဖို့ ရည်မှန်းထားတယ်။ လက်လွှတ်ခဲ့ရတဲ့ ကျွန်တော့်ရဲ့ မစ်ဒယ်ဝိတ်တန်းချန်ပီယံဆုကို ပြန်ယူမယ်။ လိုက်ဟဲဗီးဝိတ်တန်း ချန်ပီယံဆုကို ကာကွယ်မယ်။ လက်ရှိမှာလည်း လေ့ကျင့်မှုတွေကို နေ့စဉ်လုပ်နေပါတယ်။ အထူးသဖြင့် Ground Fight ကို ပိုပြီးလေ့ကျင့်နေပါတယ်” ဟု ပြောကြားခဲ့သည်။
အောင်လအန်ဆန်သည် ONE Championship ပြိုင်ပွဲ ချန်ပီယံခါးပတ်များရရှိပြီးနောက်ပိုင်း ပထမဆုံးအကြိမ် ရှုံးနိမ့်ခဲ့ခြင်းဖြစ်သည်။ အောင်လအန်ဆန်သည် ONE မစ်ဒယ်ဝိတ်တန်းနှင့် လိုက်ဟဲဗီးဝိတ်တန်းတွင် ချန်ပီယံခါးပတ်ရရှိပြီးနောက် ဒီရစ်ဒါနှင့် ပွဲမတိုင်ခင်အထိ ချန်ပီယံကာကွယ်ပွဲလေးပွဲ ထိုးသတ်ထားရာ လေးပွဲစလုံး အနိုင်ရထားသူ ဖြစ်သည်။ အောင်လအန်ဆန်သည် မစ်ဒစ်ဝိတ်တန်း ချန်ပီယံကာကွယ်ပွဲတွင် ဟဆဲဂါ၀ါ ကို နှစ်ပွဲ၊ ကရာကီကို တစ်ပွဲနှင့် လိုက်ဟဲဗီး ၀ိတ်တန်း ချန်ပီယံကာကွယ်ပွဲတွင် ဟဲဗီးဝိတ် တန်းချန်ပီယံ ဘရန်ဒန်ဗီရာကို အနိုင်ရထား ခြင်းဖြစ်သည်။
အောင်လအန်ဆန်သည် လိုက်ဟဲဗီးဝိတ်တန်း ချန်ပီယံခါးပတ်ကို ကာကွယ်မည်ဖြစ်သော်လည်း ကိုယ်အလေးချိန်အရ မစ်ဒယ်ဝိတ်တန်းကသာ အဆင်အပြေဆုံးဖြစ်ကြောင်း သုံးသပ်ပြောကြားထားသည်။ အောင်လအန်ဆန်သည် ၂၀၂၁ ခုနှစ်အတွက် ပထမဆုံးပွဲစဉ်ကို ယခုနှစ်အစောပိုင်းကာလအတွင်း ထိုးသတ်ရဖွယ်ရှိနေကြောင်းလည်း သိရသည်။ အောင်လအန်ဆန်သည် MMA ကစား သမားဘဝတွင် ၃၈ ပွဲ ယှဉ်ပြိုင်ထိုးသတ်ရာ ၂၆ ပွဲနိုင်၊ ၁၁ ပွဲ ရှုံးနိမ့်ထားပြီး တစ်ပွဲမှာ ရလဒ် ပယ်ဖျက်ခံခဲ့ရသည်။
