အာဆင်နယ်နည်းပြ မီကယ်အာတီတာက တော့တင်ဟမ်နဲ့ မြောက်လန်ဒန်ဒါဘီပွဲစဉ်မတိုင်ခင် အသင်းခေါင်းဆောင် အိုဒီဂတ်နဲ့ ကွင်းလယ်လူ မာရီနိုတို့ရဲ့ဒဏ်ရာအခြေအနေတွေကို ပြောပြလာခဲ့ပါတယ်။
ဂန်းနားတွေဟာ ဒီနှစ်ရာသီ အရေးအကြီးဆုံးပွဲစဉ်တစ်ပွဲအတွက် ပြင်ဆင်နေပေမယ့် ဒဏ်ရာပြဿနာတွေကြောင့် အာတီတာအတွက် လူစာရင်းရွေးချယ်ရာမှာ ခေါင်းခဲစရာတွေ ဖြစ်စေခဲ့ပါတယ်။
ဒီကလန်ရိုက်စ် ပွဲပယ်ပြစ်ဒဏ်ထိနေချိန် အိုဒီဂတ်ကလည်း နော်ဝေအတွက် ကစားပေးရင်း ဒဏ်ရာရသွားတာကြောင့် မြောက်လန်ဒန်ဒါဘီပွဲကို လွဲချော်ဖို့များနေပါတယ်။
အဆိုပါပွဲမတိုင်ခင် အာတီတာက “ကျွန်တော်တို့ စစ်ဆေးမှုတွေ ထပ်မံပြုလုပ်ဖို့လိုပါသေးတယ်။ လာမယ့်ရက်ပိုင်းအတွင်း ဘာဖြစ်လာမလဲဆိုတာ စောင့်ကြည့်ကြတာပေါ့။ ဒီနေ့လည်မှာပဲ ဒဏ်ရာပြဿနာရဲ့အတိမ်အနက်နဲ့ ဘယ်လောက်မြန်မြန် သူပြန်လာနိုင်မလဲဆိုတာ ကြည့်ရပါမယ်။
မာတင်က အသင်းအတွက် နေ့တိုင်းရှိနေပေးချင်ပေမယ့် ကျွန်တော်တို့ စောင့်ကြည့်ရပါဦးမယ်။ အဲ့ဒီအပိုင်းကို ကျွန်တော် ဆရာဝန်ဆီ လွှဲထားပါတယ်။ သူက ပွဲတိုင်းပါဝင်ကစားချင်နေတာပါ။ သူ ပါဝင်နိုင်ဖို့ သေချာလားဆိုတာ ကျွန်တော် သိချင်ပါသေးတယ်။ ၄၈နာရီအတွင်း ခေါ်လို့ရတဲ့ ကစားသမားအကုန် ခေါ်သွားမှာပါ။ ဘာဖြစ်လာမလဲ ကြည့်ကြတာပေါ့။”လို့ ပြောခဲ့ပါတယ်။
ပခုံးရိုးကျိုးဒဏ်ရာရခဲ့တဲ့ မာရီနိုရဲ့ပတ်သက်ပြီး အာတီတာက “သူ ပိုကောင်းလာပါပြီ။ အဲ့ဒါက ဖြည်းဖြည်းချင်းတည်ဆောက်ရတာမျိုးဖြစ်လို့ ပြန်ကောင်းဖို့ အချိန်လိုပါဦးမယ်။ ဒီအချိန်တွေမှာ သူ အသင်းကို နားလည်ဖို့ ကျွန်တော်တို့ အသုံးချနေပြီး ပြန်ကောင်းလာရင် ချက်ချင်း အသင်းမှာ ထည့်ကစားဖို့ စီစဉ်ထားပါတယ်။”လို့ ဆိုခဲ့ပါတယ်။
အာဆင်နယ်အသင်းဟာ အိုဒီဂတ်သာ မပါနိုင်ရင်တော့ မနက်ဖြန်ည တော့တင်ဟမ်နဲ့ပွဲစဉ်မှာ ကွင်းလယ်လူနေရာအတွက် ရွေးချယ်စရာ အကန့်အသတ်သာ ရှိနေမှာ ဖြစ်ပါတယ်။
