ဖိလစ်ပိုင်လက်ဝှေ့အကျော်အမော် ပက်ကီယောင်းသည် မဟာပြိုင်ဘက် ဖလွိုက်မေဝယ်သာနှင့် ယခုနှစ်အတွင်း မကျေပွဲထိုးသတ်သွားရန် ဆန္ဒရှိနေကြောင်း သူ၏မန်နေဂျာဖြစ်သူ ရှောင်ဂစ်ဘွန်းစ်က ပြောကြားခဲ့သည်။
သို့သော် လက်ဝှေ့ကစားသမား နှစ်ဦးစလုံးမှာ အနားယူထားပြီးဖြစ်သောကြောင့် သရုပ်ပြပွဲအဖြစ်သာ ထိုးသတ်နိုင်မည်ဟု MP Promotions ၏အကြီးအကဲဖြစ်သူ ဂစ်ဘွန်းစ်က ဝန်ခံခဲ့သည်။ ပက်ကီယောင်းနှင့် မေဝယ်သာသည် ၂၀၁၅ ခုနှစ်က လက်စ်ဗီးဂတ်စ်မြို့ရှိ MGM Grand တွင် ထိုးသတ်ခဲ့ပြီး မေဝယ်သာက အငြင်းပွားဖွယ်မရှိ အမှတ်ဖြင့်အနိုင်ယူကာ ရာစုနှစ်၏အကြီးကျယ်ဆုံး လက်ဝှေ့ပွဲ (Fight of the Centure)အဖြစ် တင်စားခြင်းခံခဲ့ရသည်။
မေဝယ်သာသည် ယင်းပွဲအနိုင်ယူပြီးနောက် ပက်ကီယောင်းအား မကျေပွဲထိုးသတ်ခွင့် အခွင့်အရေးပေးခြင်းမရှိသည့်အတွက်လည်း ပရိသတ်များ၏ ဝေဖန်ပြစ်တင်မှုများနှင့် ရင်ဆိုင်ခဲ့ရသည်။ မကျေပွဲဖြစ်နိုင်ခြေ ရှိ၊ မရှိနှင့်ပတ်သက်ပြီး ဂစ်ဘွန်းစ်က “ဆက်သွားရအောင်၊ ကျွန်တော်ကတော့ ဒီပွဲကို မြင်လိုပါတယ်။ ဒါပေမဲ့ မေဝယ်သာကတော့ သူ့ရဲ့အတ္တမာနကြောင့် အလိုရှိမှာ မဟုတ်ပါဘူး။ လွှတ်တော်အမတ် ပက်ကီယောင်းအနေနဲ့ သရုပ်ပြပွဲတစ်ပွဲတော့ ထိုးသတ်ချင်ပါတယ်။ သူ ကြိုးဝိုင်းထဲပြန်လာရင် ဒီနှစ်အတွင်းမှာ ဖြစ်လာနိုင်ပါတယ်။ ဒါပေမဲ့ ဖြစ်နိုင်ခြေကတော့ နည်းပါတယ်” ဟု Plane Sport သို့ ပြောကြားခဲ့သည်။
မေဝယ်သာအနေဖြင့် ၂၀၁၇ ခုနှစ်တွင် UFC Star မက်ဂရီဂေါ်အား အလဲထိုးဖြင့် အနိုင်ယူပြီးနောက် ပရော်ဖက်ရှင်နယ်လက် ဝှေ့လောကမှ အနားယူသွားခဲ့ခြင်းဖြစ်ပြီး သူ၏လက်ဝှေ့သမားဘဝတွင် ၅၀ ပွဲထိုးသတ်ရာ ရာနှုန်းပြည့်အနိုင်မှတ်တမ်း ရရှိခဲ့သည်။ မေဝယ်သာသည် လက်ဝှေ့သမားဘဝမှ အနားယူပြီးနောက် သရုပ်ပြပွဲသာ ထိုးသတ်နေပြီး ၂၀၁၈ ခုနှစ်တွင် ဂျပန်ကစ်ဘောက်ဆင်သမား နာဆူကာဝါ၊ ပြီးခဲ့သည့်နှစ်တွင် You Tuber လိုဂန်ပေါလ်တို့နှင့် ထိုးသတ်ခဲ့ ခြင်းဖြစ်သည်။ မေဝယ်သာအနေဖြင့် ယခုနှစ်ကုန်ပိုင်းတွင် အရှေ့အလယ်ပိုင်းဒေသ ယူအေအီးနိုင်ငံ၌ သရုပ်ပြတစ်ပွဲထိုးသတ်ရန် စီစဉ်နေပြီး သူ၏လေ့ကျင့်ဖော်ဟောင်းဖြစ်သူ ဒွန်မိုးနှင့် ထိုးသတ်ဖွယ်ရှိနေကြောင်း သိရသည်။
