စပါးအသင်း၏ နည်းပြဖြစ်သူ အန့်ဂျ်ပိုစတီကိုဂလူးက လက်ရှိ စပါးအသင်း၏ ရလဒ်ဆိုးများအတွက် မိမိ၏အားနည်းမှုများကို ထောက်ပြဝေဖန်နိုင်သော်လည်း မိမိကစားသမားများကို ဝေဖန်ခြင်းမပြုရန် ပြောကြားခဲ့သည်။
စပါးအသင်းသည် ပြီးခဲ့သည့် ရက်ပိုင်းအတွင်း လီဗာပူးလ်အသင်းနှင့် အက်စတွန်ဗီလာအသင်းတို့ကို ဆက်တိုက်ရှုံးနိမ့်ကာ ပြိုင်ပွဲ (၂)ရပ်မှ ထွက်ခွာခဲ့ရသလို၊ ပရီးမီးယားလိဂ်ပြိုင်ပွဲတွင်လည်း ရလဒ်များ ဆိုးရွားလျက်ရှိနေသည်။
ယင်းအတွက်ကြောင့် စပါးအသင်းကစားသမားများ၏ စွမ်းဆောင်ရည်နှင့်ပတ်သက်ပြီး ဝေဖန်မှုများရှိနေသလို၊ ကစားသမားများအပေါ် သုံးသပ်ပေးရန် တောင်းဆိုခဲ့ရာ ပိုစတီကိုဂလူးက ”လူတွေက ကျွန်တော့်အပေါ် ကြိုက်သလို ဝေဖန်သုံးသပ်နိုင်တယ်။ ကျွန်တော့်အနေနဲ့ ဒီအလုပ်ကို ဆိုးဆိုးရွားရွားလုပ်နေတယ်လို့လည်း ပြောလို့ရတယ်။ ကျွန်တော်ဘာမှ လုပ်နိုင်မှာမဟုတ်ဘူးလို့ မြင်လည်း လက်ခံတယ်။ ကျွန်တော့်ရဲ့ ကစားသမားကောင်းတွေကိုတော့ ဝေဖန်စရာမလိုဘူး”ဟု ပြောကြားခဲ့သည်။
ပိုစတီကိုဂလူးသည် ရလဒ်များ ဆိုးရွားနေခြင်းကြောင့် ရာထူးမှ ထုတ်ပယ်ခံရတော့မည်ဟုလည်း ထင်ကြေးပေးခံနေရသည်။
