မိမိ၏ကစားဟန်နှင့် လိုက်ဖက်မည့် ပရီးမီးယားလိဂ်သို့ ပြောင်းရွှေ့ကစားလိုကြောင်း မန်ယူနှင့် အာဆင်နယ်ပစ်မှတ် အမ်ရာဘတ် ဝန်ခံ

မန်ယူနှင့် အာဆင်နယ်အသင်းတို့က ခေါ်ယူလိုနေသည့် ဖီအိုရင်တီးနားကွင်းလယ်လူ အမ်ရာဘတ်က မိမိ၏ကစားဟန်နှင့် လိုက်ဖက်မည့် ပရီးမီးယားလိဂ်သို့ ပြောင်းရွှေ့ကစားလိုကြောင်း ဝန်ခံပြောကြားခဲ့သည်။

အသက် (၂၆) နှစ်အရွယ်ရှိ အမ်ရာဘတ်သည် ၂၀၂၂ ကမ္ဘာ့ဖလားပြိုင်ပွဲတွင် မော်ရိုကိုအသင်းနှင့် ခြေစွမ်းပြနိုင်ခဲ့ခြင်းကြောင့် ပြီးခဲ့သည့်ဇန်နဝါရီကတည်းက ဥရောပထိပ်တန်းအသင်းများ၏ စိတ်ဝင်စားခြင်းကို ခံခဲ့ရသူဖြစ်သည်။

လက်ရှိတွင် ၎င်းအားခေါ်ယူရန် မန်ယူ၊ အာဆင်နယ်နှင့် ဘာစီလိုနာအသင်းတို့က စိတ်ဝင်စားနေကြောင်း သတင်းများထွက်ပေါ်နေသည်။ သို့သော် အမ်ရာဘတ်ကမူ မိမိအနေဖြင့် ပရီးမီးယားလိဂ်သို့သာ ပြောင်းရွှေ့ကစားလိုကြောင်း ပြောကြားခဲ့သည်။

အမ်ရာဘတ်က “ပရီးမီးယားလိဂ်က အရမ်းကောင်းတဲ့လိဂ်ပြိုင်ပွဲတစ်ခုဖြစ်ပြီး ကမ္ဘာပေါ်မှာ ပြိုင်ဆိုင်မှု ပြင်းထန်ဆုံးပြိုင်ပွဲတွေက တစ်ခုဖြစ်ပါတယ်။ တစ်နေ့ ပရီးမီးယားလိဂ်မှာ ကစားရရင် ကောင်းမှာပါ။ ဒါပေမဲ့ ကျွန်တော့်အနေနဲ့ အင်္ဂလန်တစ်ခုတည်းကိုပဲ သွားချင်တာ မဟုတ်ပါဘူး။ စပိန်ကလည်း ကောင်းပြီး စီးရီးအေကလည်း လိဂ်ပြိုင်ပွဲကောင်းတစ်ခုပါပဲ။ ဘောလုံးလောက အများကြီးပြောင်းလဲသွားပါပြီ။ ဒီနေ့ခေတ်မှာ ခန္ဓာကိုယ်ကြံ့ခိုင်မှုကို ပိုမိုအားပြုလာကြပြီး ကစားသမားတွေဆီကနေ တောင်းဆိုမှုတွေ များလာပါတယ်။ ပြိုင်ပွဲတွေရဲ့ Tempo ပိုမြင့်လာသလို၊ ပြိုင်ဆိုင်မှုလည်း ပိုပြီး ပြင်းထန်လာပါတယ်။ ကျွန်တော့်ရဲ့ကစားဟန်က ပရီးမီးယားလိဂ်နဲ့လိုက်ဖက်မယ်ထင်ပါတယ်” ဟု ဆိုခဲ့သည်။

အမ်ရာဘတ်သည် ဖီအိုရင်တီးနားအသင်းနှင့်စာချုပ်သက်တမ်းတစ်နှစ်သာကျန်တော့ပြီး ၎င်းင်း၏ပြောင်းရွှေ့ကြေးမှာ ယူရို(၂၅)သန်းဝန်းကျင်သာရှိကြောင်း သိရှိရသည်။