အေစီမီလန်အသင်း၏ နည်းပြဖြစ်သူ ပီအိုလီက မိမိတို့အသင်းသည် ချန်ပီယံလိဂ်ဆီမီးဖိုင်နယ် ပထမအကျော့ပွဲစဉ်တွင် အင်တာမီလန်အသင်းကို ၂-၀ ဂိုးဖြင့် ရှုံးနိမ့်ထားသော်လည်း ယခုအချိန်အထိ ဗိုလ်လုပွဲအတွက် မျှော်လင့်ချက်ရှိနေဆဲဖြစ်သည်ဟု ပြောကြားခဲ့သည်။
ယင်းအသင်းနှစ်သင်းသည် အင်္ဂါနေ့(ယနေ့)တွင် ဒုတိယအကျော့ပွဲစဉ်ကို ဆန်စီရိုကွင်းတွင်ပင် ကစားသွားကြမည်ဖြစ်ပြီး ယခုတစ်ကြိမ်တွင်မူ အင်တာမီလန်အသင်း၏ အိမ်ကွင်းအဖြစ် အင်တာမီလန်ပရိသတ်အများအပြား ရှေ့မှောက်တွင် ကစားရမည်ဖြစ်သည်။
ပထမအကျော့ပွဲစဉ်တွင် အင်တာမီလန်အသင်းက ပုံစံကောင်းပြသခဲ့ပြီး ဂျက်ကို၊ မစ်ခီတာရီယန်တို့၏ သွင်းဂိုးများဖြင့် အနိုင်ရရှိခဲ့ခြင်းဖြစ်ပြီး ယခု ဒုတိယအကျော့အတွက်မူ ပီအိုလီက ”ကျွန်တော်တို့ အားနည်းတဲ့ အခြေအနေနဲ့ စတင်ရမယ်ဆိုတာ သိပါတယ်။ ဒါပေမဲ့ ကျွန်တော်တို့ဆီမှာ ဒီအခြေအနေကို ပြောင်းပြန်လှန်ပစ်နိုင်တဲ့ အရည်အသွေး ရှိပါတယ်။ ဒီအချိန်မှာ ဘယ်သူကမှ ကျွန်တော်တို့ ဗိုလ်လုပွဲတက်နိုင်မယ်လို့ ထင်ကြမှာမဟုတ်ပါဘူး။ ကျွန်တော်တို့က ဒါကို တွန်းအားအဖြစ် အသုံးပြုသွားပါမယ်” ဟု ပြောကြားခဲ့သည်။
