မန်ယူအသင်း၏ ကစားသမားဟောင်း အီဗရာက ယခုနွေရာသီတွင် အသင်းသို့ရောက်ရှိလာသည့် ကစားသမားသစ် မာလာစီယာကို မိမိနှင့် နှိုင်းယှဉ်ခြင်းမပြုရန် တိုက်တွန်းပြောကြားခဲ့သည်။
အသက် (၂၃) နှစ်အရွယ်ရှိ ဒတ်ချ်ဘယ်နောက်ခံကစားသမား မာလာစီယာသည် ယခုနွေရာသီအပြောင်းအရွှေ့တွင် ဖီယင်နုအသင်းမှ မန်ယူအသင်းသို့ ယူရို (၁၅) သန်းဖြင့် ပြောင်းရွှေ့လာခဲ့သူဖြစ်သည်။
၎င်းသည် လီဗာပူးလ်အသင်းအား (၂-၁) ဂိုးဖြင့် အနိုင်ရသည့်ပွဲတွင် ခြေစွမ်းပြနိုင်ခဲ့ခြင်းကြောင်း ချီးကျူးခြင်းခံခဲ့ရပြီး မန်ယူနောက်ခံလူဟောင်း ဖာဒီနန်အပါအဝင် အသင်းပရိသတ်များက အီဗရာလက်သစ်ဖြစ်သည်ဟု ပြောဆိုခဲ့ကြသည်။
သို့သော် အီဗရာက မာလာစီယာအနေဖြင့် မိမိနှင့် နှိုင်းယှဉ်ရန် အနည်းဆုံး (၄) နှစ်လောက် ခြေစွမ်းပြနိုင်ရမည်ဖြစ်ပြီး အခုအချိန်မှာ နှိုင်းယှဉ်ရန် စောလွန်းနေသေးကြောင်း ပြောကြားခဲ့ခြင်းဖြစ်သည်။
အီဗရာက “လူတွေက မာလာစီယာကို ကျွန်တော် နဲ့ နှိုင်းယှဉ်နေကြပါတယ်။ ဒီလိုနှိုင်းယှဉ်မယ်ဆိုရင် ကမ္ဘာ့အကောင်းဆုံးဘယ်နောက်ခံလူတစ်ယောက်၊ အနည်းဆုံး နောက်ဆုံး (၄)နှစ်လောက် ပရီးမီးယားလိဂ်မှာ အကောင်းဆုံးဘယ်နောက်ခံလူတစ်ယောက်ဖြစ်နေဖို့တော့ လိုပါတယ်။ သူ့ကို အချိန်ပေးလိုက်ပါဦး”ဟု ပြောကြားခဲ့သည်။
