နော်တင်ဟမ်ဖောရက်စ်နှင့်ပွဲသည် ယခုရာသီတွင် မန်ယူအတွက် အန်သိုနီမာရှယ် လွဲချော်သွားရသည့် ၃၁ ပွဲအနက် ၁၈ ပွဲမြောက် ပွဲစဉ်ဖြစ်သည်။ မန်ယူအသင်းသည် အဖွင့် ၁၁ ယောက်တွင် မာရှယ်နှင့်အတူ အကောင်းဆုံးကစားနိုင်ကြောင်း တန်ဟက်ဂ်က အခိုင်အမာပြောကြားလိုက်သည်။ မာရှယ်သည် သီးခြားဒဏ်ရာလေးခုကြောင့် ရာသီ၏ ၁၄ ပတ်ပေါင်းကို လွဲချော်ခဲ့ပြီး ပွဲချိန်အပြည့်မကစားနိုင်သေးပေ။
အသက် ၂၇ နှစ်အရွယ် ကစားသမား မာရှယ်သည် သူဝင်မကစားတော့မည့် ၃၁ ပွဲအနက် ၁၈ ပွဲမြောက်ဖြစ်ကာ မန်ယူ၏ လိဂ်ဖလား ဆီမီးဖိုင်နယ် ပထမအကျော့ပွဲစဉ်ဖြစ်သည့် နော်တင်ဟမ်ဖောရက်စ်နှင့် လွဲချော်ခဲ့သည်။
မာရှယ်သည် လွန်ခဲ့သည့် ၁၂ လက ဆီဗီလာအသင်းထံ အငှားဖြင့် သွားကစားခဲ့ခြင်းမှ ပြန်လည်ရောက်ရှိလာပြီးကတည်းက ၅ ဂိုးသာ သွင်းယူနိုင်ခဲ့သည်။ မန်စီးတီးနှင့်ပွဲတွင် ခြေထောက်ဒဏ်ရာမရရှိခင်ကလည်း ရှစ်ပွဲဆက်တိုက် လူစားလဲခံခဲ့ရကာ ၎င်းခြေထောက်ဒဏ်ရာရခဲ့ခြင်းက ပြီးခဲ့သည့်အပတ်က သရေကျခဲ့ရသည့် ခရစ္စတယ်ပဲလေ့စ်နှင့်ပွဲနှင့် ရှုံးနိမ့်ခဲ့ရသည့် အာဆင်နယ်နှင့်ပွဲတို့တွင် သူ့အား ကစားခွင့်မရစေ ခဲ့ပေ။
“အမြဲတမ်းဒဏ်ရာမဟုတ်ပါဘူး၊ သူ ပွဲတွေ ကစားမှာပါ။ သူ့အနေနဲ့ အဲဒီလို ဖြစ်မြောက်စေရလိမ့်မယ်။ ကျွန်တော်လည်း သဘောတူတယ်။ သူက ပိုဝင်ကစားနိုင်လာရမယ်။ သူရှိနေချိန်မှာ ကျွန်တော်တို့အသင်း အကောင်းဆုံးကစားနိုင်လို့ ကျွန်တော်တို့အတွက် တကယ်ကို အရေးပါပါတယ်။ သူကလည်း ဒါကို သိထားရမယ်။ ကျွန်တော်တို့ အောင်မြင်ချင်တယ်၊ ကျွန်တော်တို့ သူ့ကို လိုအပ်တယ်။ ပထမအချက်က ပွဲတွေအတွက် သူရှိနိုင်ရမယ်။” ဟု တန်ဟက်ဂ်က ပြောကြားခဲ့သည်။
မာရှယ်သည် ပွဲများအတွက် သူ့ကိုယ်သူ အမြဲရှိနိုင်အောင်လုပ်ရန် စိတ်ဓာတ်မရှိဟူသော အဆိုနှင့်စပ်လျဥ်း၍ တန်ဟက်ဂ်က “ကျွန်တော် အဲဒီလိုမျိုး မသုံးသပ်ချင်ပါဘူး။ ကျွန်တော်ဘာပြောခဲ့သလဲ။ ဘယ်သူကမှ မတူကြဘူးလေ။ ကျွန်တော့်အနေနဲ့ သိမြင်နိုင်၊ ထောက်ပြနိုင်တယ်ဆိုရင်လည်း အဲဒီအခြေအနေကို ပြောင်းနိုင်အောင် လုပ်ဆောင်သွားမယ်။” ဟုလည်း ပြောကြားခဲ့ကြောင်း သိရသည်။
