လက်ရှိ မေဂျာလိဂ်ကလပ် LA ဂလက်ဆီအသင်းတွင် ကစားနေသည့် မန်ယူတိုက်စစ်မှူးဟောင်း ချီချာရီတိုဟာနန်ဒက်ဇ်က မန်ယူအသင်းသာ လိုအပ်မည်ဆိုပါက မိမိအနေဖြင့် အခမဲ့ကစားပေးရန် အသင့်ရှိကြောင်း ပြောကြားခဲ့သည်။
အသက် (၃၄) နှစ်အရွယ် မက္ကဆီကို၀ါရင့်တိုက်စစ်မှူး ဟာနန်ဒက်ဇ်သည် မန်ယူအသင်းတွင် ၂၀၁၀ ပြည့်နှစ်မှ ၂၀၁၅ ခုနှစ်အထိ ကစားခဲ့ပြီး ပြိုင်ပွဲစုံ (၁၅၇) ပွဲတွင် (၅၉) ဂိုး သွင်းယူခဲ့သည်။
ဟာနန်ဒက်ဇ်သည် ကစားသမားဘဝတစ်လျှောက် ဒဏ်ရာပြ ဿနာများနှင့် ရုန်းကန်ခဲ့ရပြီး လက်ရှိ မေဂျာလိဂ်ကလပ် LA ဂလက်ဆီအသင်းနှင့် ယခုနှစ်အကုန်တွင် စာချုပ်သက်တမ်းကုန်ဆုံးမည်ဖြစ်သည်။
မန်ယူအသင်းသည် ယခုနွေရာသီတွင် တိုက်စစ်မှူး ခေါ်ယူရန် ရုန်းကန်နေရပြီး ဘိုလော့ဂ်နာတိုက်စစ်မှူး အာနော်တိုဗစ်အား ခေါ်ယူရန် ကမ်းလှမ်းမှုမှာလည်း ငြင်းပယ်ခံခဲ့ရကြောင်း သိရသည်။
ထို့ကြောင့် ဟာနန်ဒက်ဇ်က ”တကယ်လို့ မန်ယူအသင်းကသာ ကျွန်တော့်ကို ကမ်းလှမ်းလာမယ်ဆိုရင် ကျွန်တော့်အနေနဲ့ သူတို့အတွက် အခမဲ့ကစားပေးမှာပါ။ ဒါပေမဲ့ လက်ရှိ ကျွန်တော့်ရဲ့အသင်းကိုလည်း လေးစားပြီး LA ဂလက်ဆီနဲ့ အတူ ဖလားယူချင်ပါတယ်။ အနာဂတ်မှာ ဘာတွေဖြစ်လာမလဲ မသိပါဘူး။ အခုတော့ LA ဂလက်ဆီအတွက် အာရုံစိုက်ထားပါတယ်”ဟု ဆိုခဲ့သည်။
