မန်စီးတီးအသင်းခေါင်းဆောင် ဂွန်ဒိုဂန် က မန်ချက်စတာမြို့ခံပြိုင်ဘက် မန်ယူအသင်းမှာ ယခင်ကထက် ပိုကောင်းလာပြီး အနိုင်ရရန်အတွက် စွမ်းဆောင်မှုပိုကောင်းရန်လိုကြောင်း အသင်းဖော်များကို သတိပေးပြောကြားခဲ့သည်။
မန်စီးတီးအသင်းသည် ဒီဇင်ဘာ ၁၁ ရက်က ကစားခဲ့သည့် လိဂ်ဖလားကွာတား ဖိုင်နယ်ပွဲစဉ်တွင် ဆောက်သမ်တန်အသင်း ကို (၀-၂) ဂိုးဖြင့် ရှုံးနိမ့်ခဲ့သည်။ ယင်းရှုံးပွဲမှာ အသင်းကစားသမားများ၏ နိုင်ပွဲဆာလောင်မှု အားနည်းခြင်းကြောင့်ဖြစ်သည်ဟု မန်စီး တီးအသင်းခေါင်းဆောင် ဂွန်ဒိုဂန်က ဝေဖန်ခဲ့ပြီး ယနေ့ကစားမည့် မန်ယူနှင့်ပွဲတွင် စွမ်းဆောင်မှုကောင်းကို ပြကြရန် အသင်းဖော်များကို တိုက်တွန်းခဲ့ခြင်းဖြစ်သည်။
ဂွန်ဒိုဂန်က “ပြီးခဲ့တဲ့ နှစ်ပတ်လောက် ကစပြီး ကျွန်တော်တို့အသင်းမှာ တစ်ခုခု ပျောက်ဆုံးနေတယ်လို့ ကျွန်တော် ခံစားခဲ့ရတယ်။ ကျွန်တော်တို့အသင်းအနေနဲ့ ပွဲတိုင်းကို အနိုင်ကစားနိုင်တဲ့ စွမ်းရည်ရှိပါတယ်။ ဒါပေမဲ့ အခုအချိန်မှာ အသင်းရဲ့ စွမ်းဆောင် ရည်နဲ့ နိုင်ပွဲအပေါ်ဆာလောင်မှု ပျောက်ဆုံးနေတယ်။ ဆောက်သမ်တန်ကို ရှုံးနိမ့်ခဲ့တာဟာ ကျွန်တော်တို့အတွက် လှန့်နှိုးလိုက်သလိုဖြစ်ဖို့ မျှော်လင့်ပါတယ်။ ကျွန်တော်တို့အနေနဲ့ ကြိုးစားရမှာပါ။ ကျွန်တော်တို့အနေနဲ့ အိုးလ်ထရက်ဖို့ဒ်မှာ ရလဒ်ကောင်းတွေ ရခဲ့ပေမဲ့ မန်ယူအသင်းက အခုဆိုရင် အရင်ကထက် ပိုကောင်းလာပါပြီ။ သူတို့ဟာ အခုအချိန်မှာ ယုံကြည်မှုအပြည့်နဲ့ ကစားနေပြီး သူတို့ကို နိုင်ဖို့ဆိုရင် ကျွန်တော်တို့ စွမ်းဆောင်မှုကောင်းဖို့လိုပါတယ်”ဟု ပြောကြားခဲ့သည်။
