ယခုနွေရာသီအပြောင်းအရွှေ့ကာလအတွင်း မန်ယူအသင်းမှထွက်မည်ဟု သတင်းများထွက်ပေါ်နေသော ပြင်သစ်ကွင်းလယ်လူ ပေါ့ဘာက ၎င်းအနေဖြင့် လာမည့်ရာသီ၌ အသင်းတွင်ဆက်ရှိနေဖွယ်ရှိကြောင်း အရိပ်အမြွက်ပြောကြားခဲ့သည်။
ပေါ့ဘာက မန်ယူအသင်းနည်းပြ ဆိုးလ်ရှားနှင့် မိမိအကြား ကောင်းမွန်သည့်ဆက်ဆံရေးရှိကြောင်းနှင့် ယခုနွေရာသီတွင် ဆန်ချို၊ ဗာရန်းအစရှိသည့် အရည်အသွေးမြင့်ကစားသမားများကို မန်ယူအသင်းခေါ်ယူနိုင်ခဲ့ခြင်းအတွက်လည်း အလွန်စိတ်ကျေနပ် ပျော်ရွှင်ရကြောင်း ပြောကြားခဲ့သည်။
ပေါ့ဘာသည် လာမည့်နှစ်နွေရာသီတွင် မန်ယူအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး လက်ရှိအချိန်အထိ အသင်းနှင့် စာချုပ်သစ်ချုပ်ဆိုမှုအတွက် သဘောတူညီမှုမရသေးသူဖြစ်သည်။
သို့ဖြစ်ရာ မန်ယူအသင်းသည် ပြောင်းရွှေ့ကြေးငွေရရှိရန်အတွက် ၎င်းအား ယခုနွေရာသီတွင်ရောင်းချသွားမည်ဟု သတင်းများ ထွက်ပေါ်နေသည်။
ပေါ့ဘာအား သူ၏စာချုပ်အခြေအနေနှင့်ပတ်သက်၍ မီဒီယာများက မေးမြန်းခဲ့ရာ ၎င်းက ”ကျွန်တော် မန်ယူအသင်းနဲ့ စာချုပ်သက်တမ်း တစ်နှစ် ကျန်နေပါသေးတယ်။ ဒါကို အားလုံးသိကြပါတယ်။ လက်ရှိအချိန်အထိတော့ စာချုပ်သစ်ချုပ်ဆိုဖို့အတွက် ခိုင်မာတဲ့ကမ်းလှမ်းချက် တစ်စုံတစ်ရာ မရှိသေးပါဘူး။ ဘာပဲဖြစ်ဖြစ် ကျွန်တော့်အနေနဲ့ မန်ယူကစားသမားတစ်ဦးအဖြစ် ရှိနေဆဲပါ”ဟု ဖြေကြားသွားခဲ့သည်။
မန်ယူအကယ်ဒမီထွက် ပေါ့ဘာသည် ၂၀၁၆ ခုနှစ်နွေရာသီတွင် ဂျူဗင်တပ်စ်အသင်းမှ ထိုအချိန်က ကမ္ဘာ့စံချိန်တင်ပြောင်းရွှေ့ကြေး ပေါင်(၈၉.၃)သန်းဖြင့် ရောက်ရှိလာသူဖြစ်သည်။
