မန်ယူကွင်းလယ်လူ မာတစ်က ပြင်သစ်ကွင်းလယ်လူ ပေါ့ဘာသည် အသင်းတွင် ပျော်ရွှင်နေကြောင်း ပြောကြားခဲ့သည်။
အသက် (၂၇)နှစ်အရွယ်ရှိ ပေါ့ဘာသည် ကိုရိုနာဗိုင်းရပ်စ်ကပ်ဘေးကာလအတွင်း ပြန်လည်ကစားသည့် ပရီးမီးယားလိဂ်ပြိုင်ပွဲတွင် မန်ယူအသင်းအတွက် ခြေစွမ်းပြကစားနေသူဖြစ်သည်။
သို့သော် မန်ယူအသင်းနှင့် ၂၀၂၁ ခုနှစ်တွင် စာချုပ်သက်တမ်းကုန်ဆုံးမည့် ပေါ့ဘာသည် အသင်းမှထွက်ခွာဖွယ်ရှိသည်ဟု သတင်းများထွက်ပေါ်နေပြီး ၎င်းကိုခေါ်ယူရန် ရီးယဲလ်အသင်းက စိတ်ဝင်စားနေကြောင်း သိရသည်။
မာတစ်ကမူ ပေါ့ဘာသည် မန်ယူအသင်းတွင် ပျော်ရွှင်နေပြီး ၎င်းကို အသင်းတွင် ကာလရှည်ဆက်ရှိနေရန် မျှော်လင့်ကြောင်း ပြောကြားခဲ့သည်။
မာတစ်က “လက်ရှိအချိန်မှာတော့ မန်ယူအသင်းမှာ သူ(ပေါ့ဘာ) ပျော်ရွှင်နေတယ်လို့ ကျွန်တော် ထင်ပါတယ်။ ပေါ့ဘာဟာ ဒဏ်ရာပြဿနာတွေကြောင့် ဒီရာသီမှာ အကြာကြီး အနားယူခဲ့ရပြီး ဘာမှ မလုပ်နိုင်ခဲ့ပါဘူး။ အခုအချိန်မှာတော့ ဘောလုံးပြန်ကစားနေပြီဖြစ်လို့ သူ ပျော်နေပါပြီ။ ကျွန်တော်က ပေါ့ဘာဟာ အသင်းအတွက် အရမ်းအရေးပါတဲ့ ကစားသမားလို့ မြင်ပါတယ်။ သူက အသင်းကို အရည်အသွေးမြင့်အောင် လုပ်ပေးနိုင်သူပါ။ ကျွန်တော်ကတော့ ပေါ့ဘာကို မန်ယူအသင်းမှာပဲ နှစ်တွေအကြာကြီး မြင်တွေ့ချင်ပါတယ်။ ဒါဟာ အသင်းအတွက်ပါ”ဟု ပြောကြားခဲ့သည်။
ထို့ပြင် မာတစ်က ဘရူနိုဖာနန်ဒက်စ်နှင့် ပေါ့ဘာတို့ ကွင်းလယ်အတွဲမှာ အလွန်ကောင်းပြီး ဘရူနိုဖာနန်ဒက်စ်နှင့် တွဲကစားရခြင်းက ပေါ့ဘာကို ပိုကောင်းလာစေသည်ဟုလည်း ပြောကြားခဲ့သည်။
