မန်စီးတီးအသင်းမှ အင်္ဂလန်ကွင်းလယ်ကစားသမား ကယ်လ်ဗင်ဖီးလစ်က မိမိအနေဖြင့် ယခုနွေရာသီအပြောင်းအရွှေ့ကာလတွင် မန်စီးတီးအသင်းမှ ထွက်ခွာမည်မဟုတ်ကြောင်း အတည်ပြုပြောကြားခဲ့သည်။
အသက် (၂၇) နှစ်အရွယ်ရှိ ကယ်လ်ဗင်ဖီးလစ်သည် ၂၀၂၂ နွေရာသီအပြောင်းအရွှေ့ကာလကမှ လိဒ်စ်အသင်းမှ မန်စီးတီးအသင်းသို့ ပေါင် (၄၂)သန်းဖြင့် ပြောင်းရွှေ့လာခဲ့သူဖြစ်သည်။
သို့သော် ၎င်းသည် ပြီးခဲ့သည့်ရာသီက ဒဏ်ရာပြဿနာများနှင့် ရင်ဆိုင်ခဲ့ရပြီး မန်စီးတီးအသင်းအတွက် ပရီးမီးယားလိဂ် (၁၂) ပွဲအပါအဝင် ပြိုင်ပွဲစုံ (၂၁) ပွဲသာ ပါဝင်ကစားခွင့်ရခဲ့သည်။
ထို့ကြောင့် ကယ်လ်ဗင်ဖီးလစ်အနေဖြင့် ယခုနွေရာသီအပြောင်းအရွှေ့ဈေးကွက်တွင် အသင်းပြောင်းရွှေ့ဖွယ်ရှိသည်ဟု သတင်းများထွက်ပေါ်နေသည်။ သို့သော် ကယ်လ်ဗင်ဖီးလစ်က “ကျွန်တော့်ရဲ့ ရည်မှန်းချက်က မန်စီးတီးအသင်းမှာ ဆက်နေဖို့ပါ။ ကျွန်တော်တို့ အခုပဲ ဖလား (၃)လုံး ရထားတာပါ။ ဒါကြောင့် အဲဒီအသင်းကို ကျွန်တော့်အနေနဲ့ စွန့်ခွာသွားစရာ အကြောင်းမရှိပါဘူး။ ရိုးသားစွာပြောရမယ်ဆိုရင် မန်စီးတီးအသင်းကို မပြောင်းခင်ကတည်းက ကျွန်တော် ဒဏ်ရာရနေခဲ့တာဖြစ်ပြီး ပြီးခဲ့တဲ့တစ်ရာသီလုံး ဒဏ်ရာပြဿနာတွေကြောင့် ကျွန်တော် ရုန်းကန်ခဲ့ရပါတယ်။ အခု ကျွန်တော့်အနေနဲ့ ကြံ့ခိုင်မှုပြည့်ဝနေပြီး လာမယ့်ရာသီမှာ မန်စီးတီးအတွက် အစွမ်းကုန်ကြိုးစားသွားမှာပါ” ဟု ပြောကြားခဲ့သည်။
