နယူးကာဆယ်ကွင်းလယ်ကစားသမား ဂီမာရေ့စ်က မန်စီးတီးအသင်းသည် အင်္ဂလန်တွင် အကောင်းဆုံးအသင်းဖြစ်ပြီး ၎င်းတို့နှင့် ပြိုင်ဘက်အဖြစ်ကစားရသည်ကို မုန်းတီးကြောင်း ဝန်ခံပြောကြားခဲ့သည်။
မန်စီးတီးအသင်းသည် ပြီးခဲ့သည့် ၂၀၂၂-၂၃ ရာသီက အဓိကဖလား (၃)လုံးရရှိခဲ့ပြီး လာမည့်ရာသီတွင်လည်း ပရီးမီးယားလိဂ်ချန်ပီယံဆုကို ကာကွယ်ရမည်ဖြစ်သည်။
လာမည့်ရာသီတွင် မန်စီးတီးအသင်းထံမှ ပရီးမီးယားလိဂ်ချန်ပီယံဆုကို ရယူရန်အတွက် နယူးကာဆယ်အပါအဝင် ပြိုင်ဘက်အသင်းများက ကြိုးပမ်းရမည်ဖြစ်သည်။
သို့သော် နယူးကာဆယ်ကွင်းလယ်ကစားသမား ဂီမာရေ့စ်က မန်စီးတီးအသင်းမှာ အခြားပရီးမီးယားလိဂ်ကလပ်အသင်းများ အားလုံးထက် ခြေတစ်လှမ်းသာနေကြောင်း ပြောကြားခဲ့ခြင်းဖြစ်သည်။
“မန်စီးတီးဟာ အင်္ဂလန်မှာရှိတဲ့ အသင်းတွေအားလုံးထက် ခြေတစ်လှမ်းသာနေတာကို ကျွန်တော်တို့ သိပါတယ်။ မန်စီးတီးနဲ့ ပြိုင်ဘက်အဖြစ် ကစားရတာက အဆိုးရွားဆုံးဖြစ်ပြီး ကျွန်တော်ကတော့ သူတို့နဲ့ ပြိုင်ဘက်အဖြစ် ကစားရတာကို မုန်းပါတယ်။ မန်စီးတီးနဲ့ ကစားရတဲ့အခါ ကျွန်တော်တို့က ကလေးတွေဖြစ်ပြီး ပရော်ဖက်ရှင်နယ်ကစားသမားတွေနဲ့ ယှဉ်ပြိုင်ရသလိုပါပဲ။ အတော်လေး ဆိုးရွားပါတယ်။ (၇)နှစ်သားနဲ့ (၁၅)နှစ်သားတွေ ယှဉ်ပြိုင်ရသလိုပါပဲ။ သူတို့က အရမ်းကောင်းပါတယ်။ မန်စီးတီးနဲ့ကစားတဲ့အခါ သူတို့ ဂိုးတွေသွင်းတာကို ကြည့်နေရတာ အရမ်းခက်ပါတယ်”ဟု ၎င်းက ပြောကြားခဲ့သည်။
