မန်စီးတီးစတားကို ခေါ်ယူရန် လီဗာပူးကို တိုက်တွန်းလိုက်တဲ့ ချာလီအဒမ်

ချာလီအဒမ်က သူ့ရဲ့ အသင်းဟောင်း လီဗာပူး အနေနဲ့ မန်စီးတီး နောက်ခံလူ ကိုင်းဝေါ်ကာကို ခေါ်ယူဖို့ ကြိုးစားရန် တိုက်တွန်းလိုက်ပါတယ်။ ဝေါ်ကာဟာ စီးတီးအတွက် ပွဲပေါင်း ၂၅၀ ကျော် ကစားပေးထားခဲ့ပြီး ပရီးမီးယားလိဂ်ဖလား ၅ ကြိမ် အက်ဖ်အေဖလား ၂ ကြိမ် ချန်ပီယံလိဂ်ဖလား တစ်ကြိမ်နဲ့ လိဂ်ဖလား ၄ ကြိမ် ရရှိအောင် ကူညီပေးခဲ့ပါတယ်။

အသက် ၃၃ နှစ်အရွယ် ကစားသမားဟာ ပြီးခဲ့တဲ့ရာသီက ဖလား ၃ လုံး ရယူနိုင်ခဲ့တဲ့ စီးတီးရဲ့ အရေးပါတဲ့ ကစားသမား ဖြစ်ခဲ့ကာ ပြိုင်ပွဲစုံ ၃၉ ပွဲ ကစားခဲ့ပေမယ့် သူ့ရဲ့ ပွဲကစားခွင့်ကို စိုးရိမ်နေရတဲ့ အနေအထားကြောင့် အီတီဟတ်ကနေ ထွက်ခွာချင်နေပါတယ်။ ဝေါ်ကာကို ဘိုင်ယန်က ခေါ်ယူရန် နီးစပ်နေပေမယ့်လည်း လီဗာပူး ကွင်းလယ်လူဟောင်း အဒမ်က သူ့ရဲ့ အသင်းဟောင်း အနေနဲ့ အင်္ဂလန် ညာနောက်ခံလူကို ခေါ်ယူရန် ကြိုးစားသင့်တယ်လို့ ဆိုလိုက်ပါတယ်။

အဒမ်က “ကျနော်ကတော့ ထရန့်ဟာ လာမည့်ရာသီ လီဗာပူးရဲ့ ကွင်းလယ်ပိုင်းမှာ တက်ကစားသွားလိမ့်မယ်လို့ ထင်ပါတယ်။ သူဟာ ပွဲတွေအပေါ် ကြီးမားတဲ့ သက်ရောက်မှု ပေးနေပါတယ်။ ဒီတစ်ပတ် အင်္ဂလန်မှာလည်း ကျနော်တို့ ဒါကို မြင်တွေ့ခဲ့ပြီးပါပြီ။ သူဟာ လီဗာပူးမှာ အနီးပေး အဝေးပေး အကောင်းဆုံး ကစားသမား ဖြစ်ပြီး pass မျိုးစုံ ပေးပို့နိုင်ပါတယ်။

အကယ်၍ ဒါမျိုးအရည်အသွေးကို ကွင်းလယ်ကနေ ရမယ် ဆိုရင် ဒါဟာ အသင်းသားတိုင်း အတွက် အခွင့်အရေးတွေ ပွင့်လာမှာပါ။ ဒါပေမယ့် လီဗာပူးတို့ သူ့ကို ဒီနေရာမှာ ဆက်ကစားစေမယ် ဆိုရင် သူတို့ ညာနောက်ခံလူ တစ်ဦး ခေါ်ယူသွားရမှာပါ။ အခုကြည့်ရတာ ဝေါ်ကာဟာ မန်စီးတီးကနေ ထွက်ခွာမယ့်ပုံစံပါပဲ။ လီဗာပူးတို့ ဒီလို ကစားသမားမျိုးကို ခေါ်ယူရန် ကြိုးစားကြည့်သင့်ပါတယ်။ သူတို့ ထရန့်ကို ကွင်းလယ်မှာ ဆက်သုံးမယ်ဆိုရင် ညာနောက်ခံလူ တစ်ဦး ခေါ်ယူဖို့ လိုပါတယ်။” လို့ ဆိုလိုက်ပါတယ်။