ဆော်ဒီကလပ် အယ်လ်ဟီလယ်အသင်း သည် မန်စီးတီးကွင်းလယ်ကစားသမား ဘာနာဒိုဆေးလ်ဗားအား တစ်နှစ်လစာ ပေါင် ၇၅ သန်းဖြင့် ခေါ်ယူရန် အသည်းအသန် ကြိုးပမ်းနေကြောင်း ဗြိတိန်သတင်းစာ Daily Mail က ဖော်ပြခဲ့သည်။
ဆော်ဒီကလပ် အယ်လ်နာဆာအသင်းသည် ပြီးခဲ့သည့် ၂၀၂၂ နှစ်ကုန်ပိုင်းတွင် ကမ္ဘာကျော်ဘောလုံးသမား စီရော်နယ်လ်ဒိုကို ခေါ်ယူပြီးနောက် ယခုနွေတွင် ဘန်ဇီမာ၊ ကွန်တေ အစရှိသည့် နာမည်ကျော်ကစားသမားများကို ခေါ်ယူထားသလို နောက်ထပ် နာမည်ကြီးကစားသမားများကိုလည်း ဆက်တိုက်ခေါ်ယူရန် ကြိုးပမ်းနေကြောင်း သိရှိရသည်။
ဆော်ဒီလိဂ်ကလပ်အသင်းများသည် ဆော်ဒီအစိုးရ၏ကျောထောက်နောက်ခံဖြင့် ကမ္ဘာကျော်ကစားသမားများကို ခေါ်ယူနေသလို ယခုအခါ အသက်အရွယ်ရှိသေးပြီး ထိပ်တန်းခြေစွမ်းရှိသည့် ကစားသမားများကိုပါ ခေါ်ယူရန်စီစဉ်နေကြောင်း သိရသည်။
အယ်လ်ဟီလယ်အသင်းသည် ဝုလ်ဗ်အသင်းမှ ပေါ်တူဂီလက်ရွေးစင်ကွင်းလယ်ကစားသမား ရူဘင်နေးဗက်စ်ကို ပေါင် ၄၇ သန်းဖြင့် ခေါ်ယူရန် သဘောတူညီမှုရပြီးနောက် မန်စီးတီးအသင်းမှ ပေါ်တူဂီလက်ရွေးစင်ကစားသမားတစ်ဦးပင်ဖြစ်သည့် ဘာနာဒိုဆေးလ်ဗားကိုပါ ခေါ်ယူရန် ကြိုးပမ်းလာခြင်းဖြစ်သည်။
အသက် ၂၈ နှစ်အရွယ်ရှိ ပေါ်တူဂီကွင်းလယ်ကစားသမား ဘာနာဒိုဆေးလ်ဗားသည် ပြီးခဲ့သည့် ၂၀၂၂-၂၃ ရာသီ ဖလားသုံးလုံးရရှိခဲ့သည့် မန်စီးတီးအသင်းတွင် အဓိက ကစားသမားအဖြစ် ခြေစွမ်းပြခဲ့သူဖြစ်သည်။ သို့သော် ဘာနာဒိုဆေးလ်ဗားအနေဖြင့် မွေးရပ်မြေ ပေါ်တူဂီနှင့်နီးသည့် ကလပ်အသင်းများသို့ ပြောင်းရွှေ့ကစားလိုနေကြောင်း သိရသည်။
လက်ရှိတွင် ဘာနာဒိုဆေးလ်ဗားအား ခေါ်ယူရန် ပြင်သစ်ထိပ်သီး PSG အသင်းကလည်း စိတ်ဝင်စားနေပြီး မန်စီးတီးအသင်းက ၎င်းအား အနာဂတ်နှင့်ပတ်သက်၍ အလျင်အမြန်ဆုံးဖြတ်ရန် တိုက်တွန်းထားကြောင်း သိရသည်။ မန်စီးတီးအသင်းနှင့် ချုပ်ဆိုထားသည့် ဘာနာဒိုဆေးလ်ဗား၏ လက်ရှိစာချုပ်မှာ ၂၀၂၅ ခုနှစ်တွင် သက်တမ်းကုန်ဆုံးမည်ဖြစ်ပြီး မန်စီးတီးအသင်းသည် ၎င်းကို ပြီးခဲ့သည့်နွေရာသီက ပေါင်သန်း ၇၀ ဖြင့် ရောင်းထုတ်ရန် စျေးကွက်တင်ခဲ့ဖူးသည်။
ယခုအခါ အယ်လ်ဟီလယ်လ်အသင်းက ဘာနာဒိုဆေးလ်ဗားအား တစ်နှစ်လစာ ပေါင် ၇၅ သန်းဖြင့် ခေါ်ယူရန် ကမ်းလှမ်းထားခြင်းဖြစ်ကြောင်း သိရသည်။ ဘာနာဒိုဆေးလ်ဗားက ယင်းကမ်းလှမ်းမှုကို လက်ခံခဲ့ပါက အယ်လ်ဟီလယ်အသင်းက ပြောင်းရွှေ့ကြေးကိုပါ ပေးချေရန် အသင့်ရှိကြောင်းလည်း သိရှိရသည်။
