စပါးအသင်းသည် မန်ချက်စတာ မြို့ခံနှစ်သင်း ခေါ်ယူရန် စိတ်ဝင်စားနေသည့် တိုက်စစ်မှူး ဟာရီကိန်းကို ပြောင်းရွှေ့ကြေး ပေါင်သန်း(၁၅၀)ဟု စျေးနှုန်းသတ်မှတ် လိုက်ကြောင်း သိရသည်။
မန်ချက်စတာမြို့ခံနှစ်သင်းဖြစ်သည့် မန်စီးတီးနှင့် မန်ယူအသင်းတို့သည် ဟာရီ ကိန်းကို ခေါ်ယူရန် ပြီးခဲ့သည့်နှစ်များကတည်းက စောင့်ကြည့်နေခဲ့ကြပြီး လာမည့်နွေရာသီ အပြောင်းအရွှေ့ကာလတွင် အပြိုင်ကြိုးပမ်း ဖွယ်ရှိကြောင်း သတင်းများ ထွက်ပေါ်နေသည်။
ဟာရီကိန်းသည် စပါးအသင်းနှင့် ၂၀၂၄ ခုနှစ်အထိ စာချုပ်ချုပ်ဆိုထားသော်လည်း တစ်ပတ်လုပ်ခ ပေါင်(၂)သိန်းသာ ရရှိ နေသည့်အတွက် လစာငွေ ပိုမိုရရှိမည့်အသင်းထံ ပြောင်းရွှေ့ရန် ဆန္ဒရှိနေကြောင်းလည်း သိရသည်။ မန်စီးတီးအသင်းသည် ၀ါရင့်တိုက်စစ်မှူး အဂွဲရိုး၏ နေရာတွင် အစားထိုးရန် ဟာရီကိန်းကို ပစ်မှတ်ထားနေခြင်း ဖြစ်သလို၊ မန်ယူအသင်းကလည်း ထိပ်တန်း တိုက်စစ်မှူးတစ်ဦး ခေါ်ယူအားဖြည့်ရန် ပြင် ဆင်နေရာ ဟာရီကိန်းကို ပစ်မှတ်ထားနေခြင်း ဖြစ်ကြောင်း သိရသည်။
စပါးအသင်းသည် ဟာရီကိန်းကို လက်လွှတ်ရန် လိုလားခြင်းမရှိသော်လည်း ကစားသမား၏ ဆန္ဒအရ မဖြစ်မနေ ဆုံးရှုံးရမည်ဆိုပါက မြင့်မားသည့် ပြောင်းရွှေ့ကြေး ရရှိရန် လိုလားနေပြီး ယခုသတ်မှတ်လိုက်သည့် ပေါင်သန်း (၁၅၀)ကို လျှော့ချပေးဖွယ်မရှိကြောင်းလည်း ဗြိတိန်မီဒီယာများက ဖော်ပြခဲ့ကြသည်။
