ဘာစီလိုနာနောက်ခံလူ ပီကေးက အသင်းဖော် မက်ဆီအား အသင်းတွင် ဆက်နေရန် တိုက်တွန်းခဲ့သည်။
မက်ဆီသည် ပြီးခဲ့သည့်နွေရာသီအပြောင်းအရွှေ့ကာလတွင် ပြောင်းရွှေ့ကြေးအလွတ်ဖြင့် ထွက်ခွာခွင့်ပေးရန် ဘာစီလိုနာအသင်းထံ တောင်းဆိုခဲ့သူဖြစ်ပြီး ခွင့်မပြုသဖြင့် ဆက်ကစားရန် ဆုံးဖြတ်ခဲ့သူဖြစ်သည်။
မက်ဆီ၏ လက်ရှိစာချုပ်မှာ ယခုရာသီကုန်တွင် သက်တမ်းကုန်ဆုံးမည်ဖြစ်ပြီး လာမည့်နွေရာသီတွင် ဘာစီလိုနာအသင်းမှ ထွက်ခွာဖွယ်ရှိသည်ဟု မီဒီယာများက ဖော်ပြနေသည်။
သို့သော် ပီကေးက မက်ဆီကို ဘာစီလိုနာအသင်းတွင် ဆက်ကစားရန် ဆွဲဆောင်နိုင်မည်ဟု ယုံကြည်လျက်ရှိနေသည်။
ပီကေးက “ကျွန်တော်တို့အနေနဲ့ မက်ဆီကို အသင်းမှာ ဆက်နေဖို့ တောင်းဆိုရမှာပါ။ ဘာတွေ ဖြစ်လာမလဲတော့ မသိသေးပါဘူး။ ကျွန်တော်တို့အနေနဲ့ အသင်းမှာ သူ ဆက်ရှိနေဖို့ မျှော်လင့်ပါတယ်။ ဘာစီလိုနာအသင်းမှာ မက်ဆီ ရှိနေသရွှေ့ မျှော်လင့်ချက်ရှိပါတယ်။ ကျွန်တော်တို့အနေနဲ့ သူ့ကို အသင်းမှာ ဆက်ရှိနေအောင် ဆွဲဆောင်နိုင်ဖို့ မျှော်လင့်ပါတယ်”ဟု ပြောကြားခဲ့သည်။
ထို့ပြင် ပီကေးက ပြီးခဲ့သည့်နွေရာသီအပြောင်းအရွှေ့ကာလတွင် အသင်း၏တိုက်စစ်မှူးတစ်ဦးဖြစ်သူ ဆွာရက်ဇ်အနေဖြင့် အက်သလက်တီကိုအသင်းသို့ ပြောင်းရွှေ့သွားခဲ့သည့်အတွက် အလွန်စိတ်မကောင်းဖြစ်ရကြောင်းလည်း ပြောကြားခဲ့သည်။
