ပြင်သစ်ထိပ်သီး PSG အသင်းသည် အသင်း၏နာမည်ကျော် အာဂျင်တီးနားတိုက်စစ်မှူး မက်ဆီအား နှစ်နှစ်သက်တမ်းတိုးစာချုပ် ချုပ်ဆိုရန်အတွက် ကမ်းလှမ်းသွားရန် စီစဉ်နေကြောင်း Goal.com က အခိုင်အမာ ဖော်ပြခဲ့သည်။
အသက် ၃၅ နှစ်ကျော်ပြီဖြစ်သူ မက်ဆီ သည် ၂၀၂၁ နွေရာသီအပြောင်းအရွှေ့ကာလတွင် ၁၇ ရာသီကြာ ကစားခဲ့သည့် ဘာစီလိုနာအသင်းနှင့် လမ်းခွဲခဲ့ပြီး PSG အသင်းသို့ ပြောင်းရွှေ့ကြေးအလွတ်ဖြင့် ပြောင်းရွှေ့ ခဲ့သည်။ မက်ဆီသည် ထိုစဉ်က PSG အသင်း နှင့် နှစ်နှစ်စာချုပ် ချုပ်ဆိုခဲ့ပြီး ယင်းစာချုပ် တွင် တစ်နှစ်ထပ်မံသက်တမ်းတိုးခွင့်ရှိသည်ဆိုသော အချက်ပါဝင်ကြောင်း သိရှိရသည်။ သို့သော် ယခုရာသီကုန်တွင် PSG အသင်း နှင့်စာချုပ်သက်တမ်းကုန်ဆုံးမည့် မက်ဆီ အား ခေါ်ယူလိုသည့် အသင်းများစွာရှိနေကြောင်း သိရှိရသည်။
မက်ဆီသည် ပြီးခဲ့သည့် ၂၀၂၁-၂၂ ရာ သီတွင် PSG အသင်း၌ ရုန်းကန်ခဲ့ရသော်လည်း ယခုရာသီတွင် ခြေစွမ်းပြနေသည့်အတွက် PSG အသင်းတာဝန်ရှိသူများသည် ၎င်းကို အသင်း၏အဓိကကစားသမားအဖြစ် ဆက်ထိန်းရန် ဆန္ဒရှိနေကြောင်း သိရသည်။ Goal.com ၏ ဖော်ပြချက်အရ PSG အသင်းသည် မက်ဆီအား နှစ်နှစ်သက်တမ်းတိုးစာချုပ် ချုပ်ဆိုရန် ကမ်းလှမ်းသွားမည်ဟု အသိပေးထားကြောင်း သိရှိရသည်။
မက်ဆီသည် လာမည့် ၂၀၂၃ နွေရာသီ အပြောင်းအရွှေ့ကာလတွင် အသင်းဟောင်း ဘာစီလိုနာအသင်းသို့ ပြောင်းရွှေ့ကြေးအလွတ်ဖြင့် ပြန်လည်ပြောင်းရွှေ့မည်ဟုသတင်း ထွက်နေသလို နာမည်ကျော်အင်္ဂလန်ဘောလုံးသမားဟောင်း ဒေးဗစ်ဘက်ခမ်ပိုင်ဆိုင်သည့် အမေရိကန်မေဂျာလိဂ်ကလပ် အင်တာမိုင်ယာမီအသင်းကလည်း ၎င်းကိုခေါ်ယူရန် စိတ်ဝင်စားနေကြောင်း သိရှိရသည်။ သို့သော် Goal.com ကမူ မက်ဆီအနေဖြင့် လာမည့် ၂၀၂၃ နွေရာသီတွင် အသင်းပြောင်း ရွှေ့ဖွယ်နည်းပါးပြီး လက်ရှိအချိန်ထိ ခိုင်မာသည့် ကမ်းလှမ်းမှုမရှိသေးကြောင်း ဖော်ပြခဲ့သည်။
PSG အသင်းသည် မက်ဆီအား လက်ရှိရရှိနေသည့်လစာကို တိုးပေးကာ ၂၀၂၅ ခုနှစ်အထိ အသင်းတွင် ဆက်ရှိနေရန် စည်းရုံးသွားမည်ဖြစ်ပြီး မက်ဆီကလည်း လက်ခံဖွယ်ရှိကြောင်း Goal.com က ဖော်ပြခဲ့သည်။ မက်ဆီသည် ယခုရာသီ တွင် PSG အသင်းအတွက် ခြေစွမ်းပြကစားနေပြီး ပြိုင်ပွဲစုံ ၁၉ ပွဲတွင် ၁၂ ဂိုးအထိ သွင်းယူပေးထားသည်။
