ဒိုဟာမြို့မှ ကမ္ဘာ့ဖလား Fan Zone တစ် ခုတွင် အာဂျင်တီးနားအသင်းခေါင်းဆောင် မက်ဆီအား ဆဲဆိုခဲ့သည့် မက္ကဆီကိုပရိသတ် များနှင့် အာဂျင်တီးနားပရိသတ်များအကြား ခိုက်ရန်ဖြစ်ပွားခဲ့ပြီး ပရိသတ်အများအပြား အသေးစားဒဏ်ရာများရရှိခဲ့ကြကြောင်း ဗြိတိန် သတင်းစာ Mirror က ဖော်ပြခဲ့သည်။
အဆိုပါဖြစ်ရပ်မှာ ကမ္ဘာ့ဖလားပြိုင်ပွဲတွင် ဗိုလ်စွဲရန်ရေပန်းစားသည့် အသင်းများထဲတွင်အပါအဝင်ဖြစ်သော အာဂျင်တီးနားအသင်းက ဆော်ဒီအသင်းကို အံ့အားသင့်ဖွယ် ရှုံးနိမ့်ပြီးနောက် နောက်တစ်နေ့အကြာဖြစ်သည့် နိုဝင်ဘာ ၂၃ ရက် (ဗုဒ္ဓဟူးနေ့) တွင် ဖြစ်ပွားခဲ့ခြင်းဖြစ်ကြောင်း သိရှိရသည်။
၂၀၂၂ ကမ္ဘာ့ဖလားအိမ်ရှင် ကာတာနိုင်ငံ၏မြို့တော် ဒိုဟာမြို့ရှိ Al Bidda Park တွင် ပြုလုပ်ထားသည့် ကမ္ဘာ့ဖလား Fan Zone ၌ မက္ကဆီကို ပရိသတ်များသည် အာဂျင်တီးနားအသင်းခေါင်းဆောင် မက်ဆီကို ဆဲဆိုသည့်သံချပ်များ သံပြိုင်အော်ဟစ်ခဲ့ကြကြောင်း သိရသည်။ ယင်းကို သည်းမခံနိုင်သည့် အာဂျင်တီးနား ပရိသတ်များက တိုက်ခိုက်ရာမှစတင်ပြီး ခိုက်ရန်ဖြစ်ပွားခဲ့ခြင်းဖြစ်ကြောင်း Mirror က ဖော်ပြခဲ့သည်။
လူမှုကွန်ရက်တွင် ပျံ့နှံ့ခဲ့သည့် ဗီဒီယိုဖိုင်တွင် မက္ကဆီကိုဂျာစီ ဝတ်ဆင်ထားသည့် ပရိသတ်များနှင့် အာဂျင်တီးနားဂျာစီ ဝတ်ဆင်ထားသည့် ပရိသတ်များသည် တစ်ဖက် နှင့်တစ်ဖက် ထိုးကြိတ်နေသည်ကို မြင်တွေ့ခဲ့ရသည်။ အဆိုပါရန်ပွဲမှာ ခဏတာဖြစ်ပွားခဲ့ပြီးနောက် အလိုအလျှောက် ပြီးသွားခဲ့သော်လည်း ယင်းရန်ပွဲတွင်ပါဝင်ခဲ့သည့် ပရိသတ်အများအပြား အသေးစားဒဏ်ရာများ ရရှိခဲ့ကြကြောင်း Mirror က ဖော်ပြခဲ့သည်။
အာဂျင်တီးနားနှင့် မက္ကဆီကိုအသင်း တို့သည့် ၂၀၂၂ ကမ္ဘာ့ဖလားအုပ်စု (C) တွင် အတူ ကျရောက်နေပြီး အာဂျင်တီးနားအသင်း သည် အုပ်စုအဖွင့်ပွဲတွင် ဆော်ဒီအသင်းကို ရှုံးနိမ့်ထားပြီး မက္ကဆီကိုအသင်းမှာမူ ပိုလန် နှင့် သရေကျထားသည်။ အာဂျင်တီးနားနှင့် မက္ကဆီကိုအသင်းတို့သည် ယနေ့ ထိပ်တိုက်ရင်ဆိုင်ကစားမည်ဖြစ်သည်။ အဆိုပါပွဲစဉ်မှာ အုပ်စုအဖွင့်ပွဲတွင် နိုင်ပွဲ ပျောက်ခဲ့သည့် အာဂျင်တီးနားနှင့် မက္ကဆီကို တို့နှစ်သင်းစလုံးအတွက် နောက်တစ်ဆင့် တက်ရောက်ရေး အလွန်အရေးကြီးသည့်ပွဲစဉ်ဖြစ်သည်။
ထို့ကြောင့် ယခုကတည်းက အာဂျင်တီးနားနှင့် မက္ကဆီကိုတို့ကစားမည့်ပွဲမှာ တင်းမာမှုမြင့်တက်နေပြီး မက္ကဆီကိုပရိသတ်များသည် အာဂျင်တီးနားအသင်းခေါင်းဆောင် မက်ဆီကို ဆဲဆိုရာမှ ယခုကဲ့သို့ အာဂျင်တီးနားပရိသတ်များနှင့် ခိုက်ရန်ဖြစ်ပွားခဲ့ရခြင်း ဖြစ်သည်။ ၂၀၂၂ ကမ္ဘာ့ဖလားအုပ်စု (C) ပွဲစဉ် ၁ အပြီးတွင် ဆော်ဒီက သုံးမှတ်ဖြင့် နံပါတ် ၁ နေရာရပ်တည်နေပြီး မက္ကဆီကိုနှင့် ပိုလန်တို့မှာ ရမှတ် တစ်မှတ်စီ ရရှိထားကာ အာဂျင်တီးနားမှာမူ အမှတ်မရသေးဘဲ ဇယား အောက်ဆုံး၌ ရပ်တည်နေသည်။
