မန်စီးတီးအသင်းသည် ဘာစီလိုနာအသင်းခေါင်းဆောင် မက်ဆီကို (၅) နှစ်စာချုပ် အတွက် ပေါင်သန်း (၄၃၀) ဖြင့် ကမ်းလှမ်းထားသည်ဆိုခြင်းမှာ မဟုတ်မှန်ကြောင်း ငြင်းဆန်ခဲ့သည်။
အသက် (၃၃)နှစ်အရွယ်ရှိ အာဂျင်တီးနားတိုက်စစ်မှူး မက်ဆီသည် ပြီးခဲ့သည့်နွေရာသီအပြောင်းအရွှေ့ကာလကတည်းက မန်စီးတီးအသင်းသို့ ပြောင်းရွှေ့မည်ဟု သတင်းထွက်ခဲ့သူဖြစ်သည်။
ဗြိတိန်အခြေစိုက် The Sun သတင်းစာက မန်စီးတီးအသင်းသည် ပြီးခဲ့သည့်နွေရာသီအပြောင်းအရွှေ့ကာလတွင် မက်ဆီကို (၅)နှစ်စာချုပ်အတွက် ပေါင်သန်း (၆၀၀)ဖြင့် ကမ်းလှမ်းခဲ့သလို လက်ရှိတွင်လည်း ပေါင်သန်း (၄၃၀) ဖြင့် ကမ်းလှမ်းထားကြောင်း ဖော်ပြခဲ့ခြင်းဖြစ်သည်။
မန်စီးတီးအသင်းအနေဖြင့် မက်ဆီအား ကမ်းလှမ်းခဲ့သည့် ငွေကြေးပမာဏကို ပြီးခဲ့သည့်နှစ်ကထက် ပေါင်သန်း (၁၇၀)အထိ လျှော့ချခဲ့ခြင်းမှာ ကိုရိုနာဗိုင်းရပ်စ်ကပ်ဘေးကြောင့် ဘဏ္ဍာရေးအကျပ်အတည်းနှင့် ရင်ဆိုင်နေရခြင်းဖြစ်သည်ဟုလည်း The Sun က ဖော်ပြခဲ့သည်။
သို့သော် မန်စီးတီးအသင်း၏ ပြောရေးဆိုခွင့်ရှိသူတစ်ဦးက အသင်းအနေဖြင့် မက်ဆီကို ပြီးခဲ့သည့် နွေရာသီအပြောင်းအရွှေ့ကာလတွင် ကမ်းလှမ်းခဲ့ခြင်းမရှိသလို၊ ယခုသတင်းမှာလည်း မဟုတ်မှန်ကြောင်း ငြင်းဆန်ခဲ့ခြင်း ဖြစ်သည်။
ယခုရာသီကုန်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးမည့် မက်ဆီသည် အသင်းမှထွက်ခွာဖွယ်ရှိနေသည်ဟု သတင်းများက ဖော်ပြနေကြပြီး ၎င်းကို ခေါ်ယူရန် မန်စီးတီးနှင့် PSG အသင်းတို့က စိတ်ဝင်စားနေကြောင်း သိရသည်။
