ဂျူဗင်တပ်စ်အသင်းဥက္ကဋ္ဌ အဂ္ဂါနယ်လီက ချန်ပီယံလိဂ်ပွဲစဉ်တွင် အစ္စရေးကလပ် မက္ကာဘီဟိုင်ဖာအသင်းအား ရှုံးနိမ့်ခဲ့ခြင်းအတွက် ဒေါသထွက်ခဲ့ရသော်လည်း အသင်းနည်းပြ အယ်လီဂရီကို ရာထူးမှ ထုတ်ပယ်မည် မဟုတ်ကြောင်း အတည်ပြုပြောကြားခဲ့သည်။
ယခုရာသီတွင် ဂျူဗင်တပ်စ်အသင်းသည် ရလဒ်ဆိုးရွားလျက်ရှိရာ အသင်းပရိသတ်များက နည်းပြ အယ်လီဂရီအား ရာထူးမှထုတ်ပယ်ရန် တောင်းဆိုမှုများ မြင့်တက်နေသည်။
ယင်းအခြေအနေတွင် အောက်တိုဘာ (၁၁)ရက်က ကစားခဲ့သည့် ချန်ပီယံလိဂ်အုပ်စုပွဲစဉ်တွင် ဂျူဗင်တပ်စ်အသင်းသည် မက္ကာဘီဟိုင်ဖာအသင်းကို အဝေးကွင်း၌ (ဝ-၂) ဂိုးဖြင့် ရှုံးနိမ့်ခဲ့ခြင်းဖြစ်သည်။
ထို့ကြောင့် ဂျူဗင်တပ်စ်အသင်းသည် ချန်ပီယံလိဂ်အုပ်စုပွဲစဉ် (၄)အပြီးတွင် (၁) ပွဲနိုင်၊ (၃) ပွဲရှုံးဖြင့် အုပ်စု (H) တွင် ရမှတ် (၃) မှတ်သာ ရရှိထားပြီး အဆင့် (၃) နေရာ၌ ရပ်တည်နေရာ အဆင့် (၁) မှာ PSG (၈ မှတ်)၊ ဘင်ဖီကာ (၈ မှတ်)တို့နှင့် (၅) မှတ်အထိ ကွာဟနေသဖြင့် အုပ်စုအဆင့်မှ ထွက်ခွာရရန် နီးစပ်သွားခဲ့ပြီဖြစ်သည်။
သို့သော် အဂ္ဂါနယ်လီက “အယ်လီဂရီက ကျွန်တော်တို့ရဲ့ နည်းပြဖြစ်ပြီး အသင်းမှာ သူ ဆက်ရှိနေပါလိမ့်မယ်။ မက္ကာဘီဟိုင်ဖာကို ရှုံးနိမ့်ခဲ့ခြင်းအတွက် ရှက်သလို၊ ဒေါသလည်း ထွက်ရပါတယ်။ ဒါပေမဲ့ အခုလိုအခြေအနေမှာ တစ်ယောက်တည်းကို အပြစ်တင်လို့ မရပါဘူး။ အားလုံးမှာ တာဝန်ရှိပါတယ်” ဟု ပြောကြားခဲ့သည်။
ဂျူဗင်တပ်စ်အသင်းသည် စီးရီးအေတွင်လည်း ရလဒ်ဆိုးရွားနေပြီး ပွဲစဉ် (၉) အပြီးတွင် (၃) ပွဲနိုင်၊ (၄) ပွဲသရေ၊ (၂) ပွဲရှုံးဖြင့် ရမှတ် (၁၃)မှတ်ရရှိထားကာ ထိပ်ဆုံးမှ နာပိုလီ (၂၃ မှတ်)နှင့် (၁၀)မှတ် ကွာဟနေသည်။
