မန်စီးတီးတိုက်စစ်မှူး ဟာလန်းက ဂယ်ရီနဗီးလ်၊ ကာရေဂါတို့ကဲ့သို့ ဘောလုံးဝေဖန်သူများ၏ ဝေဖန်မှုများကို ဂရုမစိုက်ကြောင်း ဖွင့်ဟပြော ကြားခဲ့သည်။
အသက် (၂၃) နှစ်အရွယ်ရှိ နော်ဝေလက်ရွေးစင်တိုက်စစ်မှူး ဟာလန်းသည် ပြီးခဲ့သည့် ၂၀၂၂ နွေ ရာသီက ဒေါ့မွန်အသင်းမှ မန်စီးတီးအသင်းထံသို့ ပေါင် (၅၁.၂)သန်းဖြင့် ပြောင်းရွှေ့လာခဲ့သူဖြစ်သည်။
မန်စီးတီးအသင်းထံသို့ ဟာလန်း ပြောင်းရွှေ့စဉ်က ဘောလုံးဝေဖန်သူအချို့က ၎င်း၏အပြောင်းအရွှေ့အပေါ် ဝေဖန် မှုများရှိခဲ့သည်။ ထို့ပြင် မန်စီးတီးတွင် ဟာလန်း ခြေစွမ်းပြပြီး ဂိုးများဆက်တိုက်သွင်းယူစဉ်ကလည်း ၎င်းင်းအနေဖြင့် အသင်း၏ကစားကွက်တွင် ပါဝင်ပတ်သက်မှု အားနည်းသည်ဟုဆိုကာ ဝေဖန်ပြစ်တင်မှုများရှိခဲ့သည်။
လက်ရှိတွင် ဒဏ်ရာပြဿနာကြောင့် အနားယူနေရသည့် မန်စီးတီးတိုက်စစ်မှူး ဟာလန်းက မိမိအနေဖြင့် ဝေဖန်မှုများကို ဂရုမစိုက်ကြောင်း ပြောကြားခဲ့ခြင်းဖြစ်သည်။
၎င်းက “ကျွန်တော့်အကြောင်း ပြောကြ၊ ရေးကြတာတွေကို ကျွန်တော် ဂရုမစိုက်ပါဘူး။ ကျွန်တော်က ကိုယ့်အလုပ်ကို ကိုယ်လုပ်ဖို့နဲ့ အသင်းကို အကောင်းဆုံးကူညီနိုင်ဖို့ပဲ ကြိုးစားပါတယ်။ တစ်ခါတလေ ကျွန်တော် ဂိုးသွင်းမယ်။ တစ်ခါ တလေကျတော့ တခြားအရာတွေ လုပ်မယ်”ဟု ပြောကြားခဲ့သည်။
ဟာလန်းသည် ပြီးခဲ့သည့်ရာသီက မန်စီးတီးအတွက် ပြိုင်ပွဲစုံ (၅၃)ပွဲတွင် (၅၂)ဂိုးသွင်းခဲ့သလို၊ ယခုရာသီတွင်လည်း ပြိုင်ပွဲစုံ (၂၂)ပွဲတွင် (၁၉)ဂိုး သွင်းယူထားသည်။
