လာမယ့် စနေနေ့ည မှာ ဘောလုံး ပရိသတ်တွေ မျှော်လင့် စောင့်စားနေကြတဲ့ ချန်ပီယံလိဂ် ဗိုလ်လုပွဲ အဖြစ် အင်္ဂလန် ပရီးမီးယားလိဂ် ထိပ်သီး ကလပ် ၂သင်း ဖြစ်တဲ့ ချဲလ်ဆီး နဲ့ မန်စီးတီး အသင်းတို့ ပေါ်တူဂီမြေမှာ အကြိတ်အနယ် ထိပ်တိုက် ယှဉ်ပြိုင်ကြတော့မှာ ဖြစ်ပါတယ် ။
ဒီ ၂သင်းဟာ ဒီရာသီ ပြည်တွင်း ပြိုင်ပွဲတွေမှာ ၃ကြိမ် အထိ ထိပ်တိုက် တွေ့ဆုံထားပြီး ဖြစ်တဲ့ အတွက် ၊ တသင်းရဲ့ အထား တသင်း အတော်လေး နပ်နေကြပြီ ဖြစ်လို့ ၊ ပရိသတ်တွေကို အပြည့်အဝ ဖျော်ဖြေမှုပေးမယ့် ပွဲတပွဲ ဖြစ်လာမှာ သေချာပါတယ် ။
ပရီးမီးယားလိဂ် ချန်ပီယံ ဖြစ်ထားတဲ့ အပြင် ၊ ကစားသမား အင်အားနဲ့ အရည်အချင်းပိုင်း တွေမှာ မန်စီးတီး ဟာ ချဲလ်ဆီး ထက် အတိုင်းအတာ တခု အထိ အသာစီး ပိုရထားတယ် ဆိုတာ ငြင်းမရပေမယ့် ၊ ချန်ပီယံလိဂ် ဗိုလ်လုပွဲဟာ တပွဲတိုး အနေအထား ဖြစ်လို့ ၊ ဘယ်သူက အနိုင်ရသွားမလဲ ဆိုတာ ခန့်မှန်းရ ခက်ပါတယ် ။
ဒီရာသီ သူတို့ကို ၂ကြိမ် အနိုင်ရခဲ့တဲ့ ချဲလ်ဆီးနဲ့ ပတ်သက်ပြီး မန်စီးတီး နည်းပြ ပက် ဂွာဒီယိုလာ က ” ဘောလုံးက သူတို့ အသင်းရဲ့ ခြေထဲမှာ ရှိနေရင် ၊ သူတို့ကို ထိန်းချုပ်ရ အရမ်း ခက်ပါတယ် ။ ဘာလို့လဲ ဆိုတော့ ကစားသမား တယောက်နဲ့ တယောက် အရမ်း နီးနီးကပ်ကပ် ကစားနေကြလို့ပါ ။ သူတို့ အသင်းရဲ့ ကွင်းလယ်ခံစစ် ကစားသမားတွေကလည်း ကွင်းတဖက်ခြမ်းမှာ အကောင်းဆုံး တုန့်ပြန် ကစားတတ်ကြပါတယ် ။ ”
” တချိန်တည်းမှာ သူတို့ဟာ wing-back ကစားသမားတွေနဲ့ နေရာကျဲကျဲ ကစားဖို့ ကြိုးစားလာသလို ၊ တီမို ဗာနာလို လျင်မြန်တဲ့ ကစားသမားမျိုးတွေနဲ့ ပြိုင်ဖက် ခံစစ်ကို အတွင်းအထိ ထိုးဖောက်နိုင်ဖို့ လုပ်ဆောင်တတ်ကြပါတယ် ။ ဒါ့အပြင် အထောင် တိုက်စစ်မှူးရဲ့ အနောက်မှာ မေဆင်မောင့် ၊ ပူလီဆစ် တို့လို အတိုးအလှုပ်ကောင်းတဲ့ ကစားသမားတွေနဲ့ ဝန်းရံထားတဲ့ အတွက် သူတို့ဟာ ထိန်းချုပ်ရ အရမ်း ခက်ခဲပါတယ် ။ ”
” ဒီ ကစားသမားတွေဟာ ဘောလုံး ရတာနဲ့ အရှေ့ကို ပေးပြီး တိုက်ရိုက် တိုက်စစ်ဆင်ဖို့ပဲ ကြိုးစားကြပါတယ် ။ သူတို့ရဲ့ လှုပ်ရှားမှုတွေက အလွန် ပါးနပ်မှု ရှိပါတယ် ။ ဒီနေ့ မနက်ကပဲ သူတို့နဲ့ ဗီလာ ကစားခဲ့တာကို ကျွန်တော် ပြန်ကြည့်ဖြစ်ခဲ့ပါတယ် ။ ဒီပွဲကို သူတို့ ရှုံးခဲ့ပေမယ့် ကစားပုံ ကောင်းပြီး ၊ ပွဲကို ထိန်းချုပ်နိုင်ခဲ့ပါတယ် ။ ”
” သူတို့ရဲ့ တိုးတက်မှုနဲ့ လျှောက်လှမ်းနေတဲ့ လမ်းစဉ်တွေက အရမ်း ကောင်းပါတယ် ။ ဒီထက် ပိုပြီး ခက်ခဲတဲ့ ပြိုင်ဖက်မျိုး ကျွန်တော် ထပ်ပြီး မျှော်မှန်းမရတော့ပါဘူး ။ ဒါကို ကျွန်တော်တို့ သိထားကြပါတယ် ။ ကျွန်တော် တို့ဟာ ကိုယ်သိထား တတ်ထားသလောက်နဲ့ သူတို့ကို အနိုင်ယူဖို့ ကြိုးစားသွားမှာပါ ။ ”
” ကျွန်တော် ကတော့ ကိုယ့်အသင်း ဘောလုံးခြေထဲမှာ ရှိနေတဲ့အချိန် ဘာလုပ်ပြနိုင်မလဲ ဆိုတာကိုပဲ ပိုပြီး စိတ်ပူမိပါတယ် ။ ပထမဆုံး နေ့ရက်ကတည်းက ကျွန်တော်တို့ ဘောလုံး ခြေထဲရှိနေတဲ့ အချိန် ချဉ်းကပ်တဲ့ နည်းစနစ်က အလုပ် ဖြစ်ခဲ့တယ် ဆိုရင် ၊ ဒီပုံစံ အတိုင်းပဲ စနေနေ့ ဗိုလ်လုပွဲ မတိုင်မီ ၂ရက်လောက် ကျွန်တော်တို့ လေ့ကျင့်ကြမှာ ဖြစ်ပါတယ် ။ ” လို့ ပြောကြားခဲ့ပါတယ် ။
တဖက်မှာ ဂွာဒီယိုလာ နဲ့ ချဲလ်ဆီး နည်းပြ သောမတ်စ် တူချယ်တို့ဟာ အပြင်မှာ ရင်းနှီးတဲ့ ဆက်ဆံရေးမျိုး ပိုင်ဆိုင်ထားကြပါတယ် ။ လွန်ခဲ့တဲ့ ၅နှစ်ခန့် ၊ ၎င်းတို့ ၂ဦး ဘွန်ဒက်စ်လီဂါမှာ နည်းပြ အဖြစ် ရှိခဲ့စဉ် ၊ ဒီ ရင်းနှီးမှုကို ဘယ်လို တည်ဆောက်ဖြစ်ခဲ့တဲ့ အကြောင်း ဂွာဒီယိုလာ က အခုလိုပဲ ပြန်ပြောင်း ဖွင့်ဟခဲ့ပါတယ် ။
ဂွာဒီယိုလာ က ” ဘိုင်ယန်မှာ ကျွန်တော် အလုပ်လုပ်ခဲ့စဉ်က သူနဲ့ ကျွန်တော် ညစာ တခါ အတူတူ စားဖြစ်ပါတယ် ။ မြူးနစ်မြို့က Schumann’s bar ဆိုတဲ့ စားသောက်ဆိုင်မှာပါ ။ အဲ့ဒီမှာ ကျွန်တော်တို့ ဘောလုံး အကြောင်း သက်သက် ပြောခဲ့ကြပါတယ် ။ ဒါပါပဲ ။ ဘောလုံးနဲ့ ပတ်သက်တဲ့ ကျွန်တော်တို့ရဲ့ ချစ်ခြင်း မေတ္တာတွေ ၊ ကိုင်တွယ်ဖူးတဲ့ ခြေစွမ်းကောင်းတဲ့ ၊ မကောင်းတဲ့ ကစားသမား စသဖြင့် အစုံအလင် ပြောခဲ့ကြပါတယ် ။ ”
” ဘောလုံး နဲ့ ဘောလုံး အပေါ် စိတ်ဝင်စားကြတဲ့ လူတွေက ကျွန်တော်တို့ အတွက် အများကြီး အဓိပ္ပာယ် ရှိပါတယ် ။ အဲ့ဒီ စားသောက်ဆိုင်မှာ ကျွန်တော်တို့ အစားအသောက်ကောင်းနဲ့ ဝိုင်ကောင်းတွေ အတူတူ သောက်စားခဲ့ကြပါတယ် ။ အရမ်းကောင်းတဲ့ အခိုက်အတန့် တခုပါပဲ ။ ဒါဟာ အမှတ်တရကောင်း တခုပါ ။ ”
” အဲ့ဒီ အချိန်ကစပြီး ကျွန်တော်တို့ ၂ယောက်လုံး ကိုယ့်အလုပ်မှာ အသီးသီး အတွေ့အကြုံ ပိုရလာခဲ့ကြပါတယ် ။ အခုထိလည်း ကျွန်တော်တို့ အကြားမှာ အရမ်းကောင်းတဲ့ ဆက်ဆံရေး ရှိနေပြီး ၊ တယောက် အကြောင်း တယောက် သိကြသလို ၊ ကျွန်တော်တို့ဟာ အောင်မြင်မှုကို ရချင်ကြသူတွေချည်းပါပဲ ။ ” လို့ ပြောကြားခဲ့ပါတယ် ။
