စပါးအသင်းသည် ဘိုင်ယန်မြူးနစ်အသင်းက ခေါ်ယူထားရန် ပစ်မှတ်ထားနေသည့် အသင်းအဓိကတိုက်စစ်မှူး ဟာရီကိန်းအား အသင်းတွင် ဆက်ထိန်းရန်အတွက် လစာတိုးပေးပြီး စာချုပ်သစ်ချုပ်ဆိုရန် ကမ်းလှမ်းထားကြောင်း The Guardian သတင်းစာက ဖော်ပြခဲ့သည်။
ဇူလိုင် ၂၈ ရက်တွင် အသက် ၃၀ ပြည့် မည့် အင်္ဂလန်လက်ရွေးစင်အသင်းခေါင်းဆောင် ဟာရီကိန်းသည် စပါးအသင်းနှင့် စာချုပ်သက်တမ်း တစ်နှစ်သာကျန်ရှိတော့သည်။ လက်ရှိတွင် ဟာရီကိန်းအား ခေါ်ယူရန် ဂျာမန်ထိပ်သီးကလပ် ဘိုင်ယန်မြူးနစ် အသင်းက ကြိုးပမ်းနေပြီး ကစားသမားနှင့် ပုဂ္ဂိုလ်ရေးသဘောတူညီမှု ရရှိထားပြီဟု သတင်းထွက်နေသလို စပါးအသင်းထံ ပေါင် သန်း ၆၀ ဖြင့် ကမ်းလှမ်းခဲ့ကြောင်း သိရသည်။
သို့သော် စပါးအသင်းသည် ဟာရီကိန်းအတွက် ဘိုင်ယန်မြူးနစ်အသင်း၏ ကမ်းလှမ်းမှုကို ပယ်ချခဲ့ပြီး စပါးအသင်းဥက္ကဋ္ဌ လီဗီအနေဖြင့် ၎င်းကို ရောင်းထုတ်လိုခြင်းမရှိဘဲ အသင်း၌ ဆက်ထိန်းရန်သာ ဆန္ဒရှိနေကြောင်း သိရှိရသည်။ ထို့ပြင် စပါးအသင်းနည်းပြသစ် ပိုစတီကိုဂလူးကလည်း လာမည့်ရာသီတွင် ဟာရီကိန်းနှင့်အတူ လက်တွဲလုပ်ဆောင်ရန် မျှော်လင့်နေကြောင်း သိရှိရသည်။
စပါးအသင်း သည် ဟာရီကိန်းအား အစကတည်းကရောင်းချရန် ဆန္ဒမရှိဘဲ စာချုပ်သစ်ချုပ်ဆိုနိုင်မည်ဟု ယုံကြည်နေကြောင်း သိရှိရသည်။ ထို့ကြောင့် စပါးအသင်းသည် ယခုအခါ ဟာရီကိန်းအား လစာတိုးပေးကာ စာချုပ်သစ်ချုပ်ဆိုရန် ကမ်းလှမ်းခဲ့ခြင်းဖြစ်သည်။ ဟာရီကိန်းသည် လက်ရှိတွင် စပါးအသင်း၌ တစ်ပတ်လစာ ပေါင် ၂၀၀၀၀၀ ရရှိ နေပြီး ယခုအခါ စပါးအသင်းသည် ၎င်းအား ဆုကြေးများအပါအဝင် တစ်ပတ်လစာ ပေါင် ၃၀၀၀၀၀ ဖြင့် စာချုပ်သက်တမ်းတိုးရန် ကမ်းလှမ်းထားခြင်းဖြစ်ကြောင်း The Guardian က ဖော်ပြခဲ့သည်။
သို့သော် ဟာရီကိန်းဘက်ကမူ စပါးအသင်း၏ကမ်းလှမ်းမှုကို ချက်ချင်း အကြောင်းပြန်ခြင်း မရှိသေးကြောင်း သိရှိ ရသည်။ ဟာရီကိန်းသည် လာမည့်အပတ်တွင် ရာသီသစ်အတွက် စပါးအသင်းထံ အကြောင်းကြားရမည်ဖြစ်ပြီး ယင်းနောက် အသင်းနည်းပြသစ် ပိုစတီကိုဂလူးနှင့် တွေ့ဆုံဆွေးနွေးမှုများ ပြုလုပ်ရန် စီစဉ်နေကြောင်းလည်း သိရှိရသည်။
ဟာရီကိန်းသည် စပါးအသင်းအတွက် ပြိုင်ပွဲစုံ ၄၃၅ ပွဲတွင် ၂၈၀ ဂိုးသွင်းယူထားပြီး ပရီးမီးယားလိဂ် ၂၁၃ ဂိုးသွင်းယူထားသည်။ ၎င်းသည် ပရီးမီးယားလိဂ်သမိုင်းတွင် ထာဝရဂိုးသွင်းအများဆုံးဖြစ်သူ အလန်ရှီးယား (၂၆၀ ဂိုး) ၏ စံချိန်ကို ချိုးဖျက်ရန် စိတ်အား ထက်သန်နေကြောင်းလည်း သိရှိရသည်။
