မန်စီးတီးအသင်း၏ နည်းပြဖြစ်သူ ဂွါဒီယိုလာက သူ၏အသင်းမှ ပေါ်တူဂီလက်ရွေးစင် ကွင်းလယ်တိုက်စစ်ကစားသမား ဘာနာဒိုဆေးလ်ဗားသည် လက်ရှိပရီးမီးယားလိဂ်တွင် အကောင်းဆုံးဘောလုံးသမားဖြစ်ကြောင်း ချီးကျူးပြောကြားခဲ့သည်။
ဂွါဒီယိုလာသည် ပြီးခဲ့သည့် ပရီးမီးယားလိဂ်ပွဲစဉ်တွင် အက်စတွန်ဗီလာအသင်းကို အနိုင်ရရှိခဲ့ပြီးနောက် နည်းပြဘဝ ပရီးမီးယားလိဂ်နိုင်ပွဲ (၁၅၀)ပြည့်မြောက်ခဲ့ပြီဖြစ်ပြီး ယင်းပွဲအပြီးတွင် ဘာနာဒိုဆေးလ်ဗား၏ ခြေစွမ်းအပေါ် ချီးကျူးခဲ့ခြင်းဖြစ်သည်။
ဘာနာဒိုဆေးလ်ဗားသည် ယင်းပွဲစဉ်တွင် အဆင့်မြင့်ပြီး လှပသည့်ကန်ချက်ဖြင့် မန်စီးတီးအသင်းအတွက် ဂိုးသွင်းယူပေးနိုင်ခဲ့သူလည်းဖြစ်ပြီး ဂွါဒီယိုလာက ”သူက အကောင်းဆုံးကစားသမားပါ။ သူက ကျွန်တော်တို့အသင်း (၉၈)မှတ်ရပြီး ဗိုလ်စွဲခဲ့တဲ့ လွန်ခဲ့တဲ့ (၃)နှစ်ကတည်းက အကောင်းဆုံးဘောလုံးသမားဖြစ်ပါတယ်။ သူ့ဆီမှာ အလွန်ထူးခြားတဲ့အရည်အသွေးတွေရှိပါတယ်။ လွန်ခဲ့တဲ့ (၂)နှစ်၊ (၃) နှစ်ကတည်းက သူ့ကို သေချာစောင့်ကြည့်နေမယ်ဆိုရင် အခုမြင်နေရတဲ့ ဘာနာဒိုဆေးလ်ဗားအတိုင်းပဲ ခင်ဗျားတို့ မြင်ကြမှာပါ”ဟုဆိုခဲ့သည်။
