ဘာစီလိုနာအသင်းနှင့် ဂါဗီတို့၏ စာချုပ်အခြေအနေကို ပရီးမီးယားလိဂ်ထိပ်သီးအသင်းများ စောင့်ကြည့်နေ

ပရီးမီးယားလိဂ်ထိပ်သီးကလပ်အသင်းများဖြစ်သည့် လီဗာပူးလ်၊ မန်ယူနှင့် ချယ်လ်ဆီးအသင်းတို့သည် ဘာစီလိုနာအသင်းနှင့် ဂါဗီတို့၏ စာချုပ်အခြေအနေကို စောင့်ကြည့်နေပြီး ၎င်းကိုခေါ်ယူရန် အပြိုင်စိတ်ဝင်စားနေကြကြောင်း သိရှိရသည်။

အသက် ၁၇ နှစ်အရွယ်ရှိ စပိန်လူငယ်ကွင်းလယ်ကစားသမား ဂါဗီသည် ၂၀၂၃ ခုနှစ်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး စာချုပ်သစ်အတွက် ဆွေးနွေးမှုမှာ အဆင်မပြေဖြစ်နေကြောင်း သိရသည်။

ထို့ပြင် ဘာစီလိုနာနှင့် ချုပ်ဆိုထားသည့် စာချုပ်အရ ဂါဗီ၏လျော်ကြေးမှာ ဇွန် ၃၀ ရက်အထိ ပေါင် ၄၂ သန်းသာဖြစ်ရာ လီဗာပူးလ်၊ မန်ယူနှင့် ချယ်လ်ဆီးအသင်းတို့သည် လာမည့်နွေရာသီတွင် ၎င်းကို ခေါ်ယူရန် အပြိုင်ကြိုးစားသွားမည်ဖြစ်ကြောင်း စပိန်သတင်းစာ Mundo Deportivo က ဖော်ပြခဲ့သည်။

ဂါဗီသည် လက်ရှိတွင် ဘာစီလိုနာအသင်း၌ တစ်နှစ်လစာ ပေါင် ၁၇၇၀၀၀ ကျော် သာရရှိနေပြီး လီဗာပူးလ်အသင်းက ၎င်းကို တစ်နှစ်လစာ ပေါင် ငါးသန်းအထိ ပေးချေရန် အသင့်ရှိနေကြောင်း သိရသည်။

ဘာစီလိုနာ အသင်းဥက္ကဋ္ဌဖြစ်သူ လာပေါ်တာကမူ မိမိတို့အနေဖြင့် ဂါဗီကို စာချုပ်သစ်ချုပ်ဆိုရန် စီစဉ်နေကြောင်း ပြောဆိုထားသော်လည်း လစာကိစ္စတွင်မူ ပရီးမီးယားလိဂ်အသင်းများ ကို ယှဉ်နိုင်ဖွယ်မရှိကြောင်း သိရှိရသည်။

ဂါဗီသည် ယခုရာသီတွင် ဘာစီလိုနာအသင်းအတွက် ပြိုင်ပွဲစုံ ၃၄ ပွဲအထိ ကစားထားပြီး ၎င်းကိုခေါ်ယူရန် ဥရောပထိပ်သီးအသင်းများဖြစ်သည့် PSG နှင့် ဘိုင်ယန်မြူးနစ်အသင်းတို့ပါ စိတ်ဝင်စားနေကြောင်း သိရသည်။