ဘာစီလိုနာအပေါ် နာဂယ်စ်မန်း နှင့် အိုလီဗာခန်း အမြင်မတူ

ဘာစီလိုနာအသင်း၏ အပြောင်းအရွှေ့လုပ်ဆောင်ပုံများနှင့်ပတ်သက်ပြီး ဘိုင်ယန်အသင်းအမှုဆောင်အရာရှိချုပ် အိုလီဗာခန်းနှင့် နည်းပြ နာဂယ်စ်မန်းတို့အကြား အမြင်ကွဲပြားနေကြောင်း သိရသည်။

ဘိုင်ယန်မြူးနစ်အသင်းသည် အဓိကတိုက်စစ်မှူး လီဝန်ဒေါစကီးကို လက်လွှတ်ဆုံးရှုံးလိုက်ရပြီးနောက် နာဂယ်စ်မန်းက ဘာစီလိုနာအသင်းသည် ငွေကြေးမရှိသော်လည်း အလိုရှိသည့်ကစားသမားများကို ခေါ်ယူနိုင်သော ကမ္ဘာပေါ်ရှိ တစ်ခုတည်းသောကလပ်အသင်းဖြစ်သည်ဟု ဝေဖန်ခဲ့ခြင်းဖြစ်သည်။

နာဂယ်စ်မန်း၏ဝေဖန်ချက်အပေါ် သဘောတူပါသလားဟု မေးမြန်းမှုကို အိုလီဗာခန်းက “ဘာစီလိုနာအသင်းဟာ အမှန်တကယ်တော့ အကြွေးတွေ အမြောက်အမြား ရှိပါတယ်။ ဒါပေမဲ့ ကျွန်တော်တို့အနေနဲ့ ဒါကို အဝေးကနေ ခန့်မှန်းအကဲဖြတ်လို့ မရပါဘူး။ ဒီကိန်းဂဏန်းတွေကို သူတို့အသင်းပဲ အသေအချာသိမှာပါ။ ဒါကြောင့် မှတ်ချက်စကားတွေ ပြောဆိုရာမှာ သတိထားရပါမယ်” ဟု ပြန်လည်ဖြေကြားခဲ့သည်။