ဘာစီလိုနာအသင်း နည်းပြရာထူးအတွက် ရေပန်းစားနေသည့် ကာတာကလပ် အယ်လ်ဆတ်အသင်းနည်းပြ ဇာဗီက မိမိ၏ အိမ်ဖြစ်သည့် ဘာစီလိုနာသို့ ပြန်ခွင့်ရလိုကြောင်းနှင့် ယခုအခြေအနေကို မကြာမီ ဖြေရှင်းနိုင်မည်ဟု မျှော်လင့်ကြောင်း ထုတ်ဖော်ပြောကြားသည်။
အသက် ၄၁ နှစ်ရှိပြီဖြစ်သည့် ဇာဗီသည် ဘာစီလိုနာအသင်း၏ လာမာစီယာအကယ်ဒမီထွက် ကစားသမားတစ်ဦးဖြစ်ပြီး အယ်လ်ဆတ်အသင်းသို့ မပြောင်းရွှေ့ခင် ၁၉၉၈ မှ ၂၀၁၅ ခုနှစ်အထိ ဘာစီလိုနာတစ်သင်းတည်း၌သာ ၁၇ ရာသီကြာ ပါဝင်ကစားခဲ့သူဖြစ်သည်။
ဇာဗီသည် ရော်နယ်လ်ကိုးမန်းကို ထုတ်ပယ်ပြီးနောက် လစ်လပ်နေသည့် နည်းပြရာထူးအတွက် ရေပန်းအစားဆုံးဖြစ်နေသလို ဘာစီလိုနာအသင်း တာဝန်ရှိသူများမှာလည်း ၎င်းအတွက် အယ်လ်ဆတ်အသင်းနှင့် ညှိနှိုင်းဆွေးနွေးရန် ကာတာနိုင်ငံ ဒိုဟာမြို့သို့ရောက်ရှိနေပြီဖြစ်ကြောင်း သိရသည်။
၎င်း၏အနာဂတ်အခြေအနေနှင့်ပတ်သက်၍ ဇာဗီက “ကျွန်တော် ဘာကာနဲ့ စကားပြောနေတာ ရက်တော်တော်ကြာပါပြီ။ အဲဒါက အားလုံးပြီးသွားပါပြီ။ အသင်းတွေဘက်ကလည်း ကျွန်တော့်အနေအထားကို သိကြပါတယ်။ မကြာခင်မှာ ဒါကိုဖြေရှင်းနိုင်ဖို့ မျှော်လင့်ပါတယ်။ အသင်းတွေအနေနဲ့ ဆွေးနွေးနေကြပါတယ်။ ကျွန်တော့်အနေနဲ့ အများကြီး ပြောလို့မရပါဘူး။ ဒါပေမဲ့ ကျွန်တော်က အကောင်းမြင်တတ်တဲ့သူပါ။ ဒါက ယေဘုယျကျကျ လုပ်ရမယ့်ကိစ္စပါ။ သူတို့ သဘောတူညီမှုရဖို့ လိုပါတယ်။ ဒါက အဓိကအချက်ပါ။ ကျွန်တော်ကတော့ အိမ်ပြန်ဖို့ ဆန္ဒရှိပါတယ်။ ကျွန်တော့်အတွက် ဘာစီလိုနာကိုပြန်ဖို့ဆိုတာ အရမ်းစိတ်လှုပ်ရှားစရာကောင်းပါတယ်”ဟု ပြောကြားသည်။
အယ်လ်ဆတ်အသင်း အမှုဆောင်ချုပ် အယ်လ်အလီက အစောပိုင်းတွင် ယခုရာသီအတွက် အရေးကြီးဆုံးအချိန်၌ ဇာဗီကို ထွက်ခွာခွင့်ပြုမည်မဟုတ်ကြောင်း ပြောကြားထားသော်လည်း ဘာစီလိုနာအသင်း တာဝန်ရှိသူများ လာရောက်မှုကို ကြိုဆိုကြောင်း အတည်ပြုခဲ့သည်။
ဇာဗီသည် အယ်လ်ဆတ်အသင်းအား နှစ်ရာသီအတွင်း ကာတာစတားလိဂ်ချန်ပီယံ တစ်ကြိမ်အပါအဝင် ဆုဖလားခုနစ်လုံးအထိ ဆွတ်ခူးရယူပေးထားသည်။
