ရီးယဲလ်မက်ဒရစ်အသင်း၏ အီတလီလူမျိုးဝါရင့်နည်းပြ အန်ဆယ်လော့တီက အဓိကပြိုင်ဘက်အသင်းဖြစ်သည့် ဘာစီလိုနာအသင်းမှာ ယခုရာသီတွင် ဆုဖလားအားလုံးကိုစိန်ခေါ် နိုင်သည့်အသင်းဖြစ်သည်ဟု ချီးကျူးပြောကြားခဲ့ကြောင်း စပိန်အားကစားသတင်းစာ Football Espana က ဖော်ပြခဲ့သည်။
ဘာစီလိုနာအသင်းသည် ယခုရာသီတွင် ဒဏ်ရာပြဿနာများနှင့်အတူ ပုံစံကောင်းပြသနိုင်ရန် ရုန်းကန်နေရပြီး လာလီဂါနှင့် ချန်ပီယံလိဂ်ကဲ့သို့ အဓိကပြိုင်ပွဲကြီးများတွင် ချန်ပီယံဆုမျှော်လင့်ချက်အတွက် ခက်ခဲဖွယ်ရှိနေကြောင်း စပိန်မီဒီယာများက သုံးသပ်ခဲ့ကြသော်လည်း အန်ဆယ်လော့တီကမူ ယင်းထင်မြင်သုံးသပ်မှုများကို ငြင်းဆန်ခဲ့ခြင်းဖြစ်သည်။
အန်ဆယ်လော့တီက “သူတို့ (ဘာစီလိုနာ)ဟာ အကောင်းဆုံးလုပ်ဆောင်နိုင်လိမ့်မယ်လို့ ကျွန်တော်ထင်ပါတယ်။ သူတို့ဟာ လာလီဂါ၊ ချန်ပီယံလိဂ်၊ စပိန်ဘုရင့်ဖလားနဲ့ စပိန်စူပါဖလားတွေအတွက် တိုက်ပွဲဝင်သွားမှာပါ။ ကျွန်တော်ဟာ အခြားသူတွေအကြောင်း ပြောရတာကြိုက်နှစ်သက်သူမဟုတ်ပါဘူး။ ဒါပေမဲ့ သေချာတာကတော့ ဘာစီလိုနာဟာ ဆုဖလားအားလုံးကို စိန်ခေါ် နိုင်တဲ့အသင်းဆိုတာပါပဲ” ဟု စပိန်အားကစားသတင်းစာ AS ၏မေးမြန်းမှုကို ဖြေကြားခဲ့သည်။
ထို့ပြင် အန်ဆယ်လော့တီက မိမိတို့အသင်းအနေဖြင့် လာမည့်စပိန်စူပါဖလားပြိုင်ပွဲအတွက် အသင့်အနေအထားဖြစ်နေကြောင်းနှင့် ချန်ပီယံဆုရယူနိုင်ရန် ကြိုးစားသွားမည်ဖြစ်ကြောင်းလည်းပြောကြားခဲ့သည်။
ရီးယဲလ်မက်ဒရစ်နှင့် ဘာစီလိုနာတို့သည် ယခုရာသီတွင် ပြိုင်ပွဲ (၄)ခုစလုံး၌ ထိပ်တိုက်တွေ့ဆုံဖွယ်ရှိနေပြီး အနီးစပ်ဆုံးအဖြစ် စပိန်စူပါဖလားဗိုလ်လုပွဲတွေ့ ရင်ဆိုင်ရဖွယ်ရှိနေသည်။
