လာလီဂါအဖွဲ့ချုပ်သည် ဘာစီလိုနာနှင့် အက်သလက်တီကိုအသင်းတို့ ဂရီးဇ်မန်းနှင့် ဆာအူလ် အလဲအထပ်လုပ်ရန် စီစဉ်နေခြင်းကို စောင့်ကြည့်နေကြောင်း သိရသည်။
ဘာစီလိုနာအသင်းသည် ဘဏ္ဍာရေးအကျပ်အတည်းနှင့် ရင်ဆိုင်နေရသောကြောင့် လစာငွေများပြားသည့် ကစားသမားများကို အသင်းမှ ရှင်းထုတ်ရန် စီစဉ်နေရာ ဂရီးဇ်မန်းသည် တစ်ဦးအပါအဝင်ဖြစ်ပြီး ယင်းအတွက် ၎င်း၏အသင်း ဟောင်း အက်သလက်တီကိုနှင့် ဆွေးနွေးခဲ့ခြင်းဖြစ်သည်။
နှစ်သင်း ဆွေံးနွေးမှုအရ ဂရီးဇ်မန်းနှင့် ဆာအူလ်တို့ အလဲအထပ်ပြုလုပ်ရန် နီးစပ်နေပြီဖြစ်ကြောင်း သတင်းထွက်ပေါ်လာချိန်တွင် လာလီဂါအဖွဲ့ချုပ်က စောင့်ကြည့်မှု ပြုလုပ်လာခြင်းဖြစ်ကြောင်း သိရသည်။
စပိန်နိုင်ငံ၌ ကစားသမားအလဲအထပ်ပြုလုပ်လျှင် ပြောင်းရွှေ့ကြေးအတွက် တန်ဖိုးနှုန်းထားကို အတိအကျဖော်ပြလေ့ မရှိသည့်အတွက် လာလီဂါအဖွဲ့ချုပ်က စောင့်ကြည့်နေခြင်းဖြစ်ပြီး ဘာစီလိုနာအသင်း၏ ဘဏ္ဍာရေးပြဿနာကြောင့် ယခုအပြောင်းအရွှေ့၌ တန်ဖိုးအတိအကျ သိရှိရရန် လိုလားနေကြောင်း သိရသည်။
သတင်းများအရမူ ဘာစီလိုနာအသင်းသည် ဂရီးဇ်မန်းအတွက် အက်သလက်တီကိုအသင်းထံမှ ဆာအူလ်နှင့် ငွေသားယူရို(၁၅)သန်း ပေးချေရန် တောင်းဆိုထားကြောင်း သိရသည်။
ဘာစီလိုနာအသင်းသည် မက်ဆီကို စာချုပ်သစ် ချုပ်ဆိုနိုင်ရန်အတွက် နည်းလမ်းမျိုးစုံ လုပ်ဆောင်နေခြင်းဖြစ်ကြောင်းလည်း သိရသည်။
