ချယ်လ်ဆီးအသင်းသည် အသင်းကွင်း လယ်ကစားသမား မေဆန်မောင့်အား မန်ယူအသင်းထံ ရောင်းချရန် သဘောတူညီခဲ့ပြီးနောက် ကွင်းလယ်ကိုပြန်လည်အားဖြည့်ရန် အတွက် ဘရိုက်တန်ကွင်းလယ်ကစားသမား ကိုင်စီဒိုအား ဒုတိယအကြိမ် ကမ်းလှမ်းရန် စီစဉ်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။
ချယ်လ်ဆီးအသင်းသည် ဇွန်လအစောပိုင်းက ဘရိုက်တန်ကွင်းလယ်ကစားသမား ကိုင်စီဒိုအား ခေါ်ယူရန် ပေါင် သန်း ၆၀ ဖြင့် ကမ်းလှမ်းခဲ့ရာ ပယ်ချခံခဲ့ရပြီး ဘရိုက်တန်အသင်းက ၎င်းအတွက် အနည်းဆုံး ပေါင် သန်း ၈၀ အလိုရှိနေကြောင်း သိရှိရသည်။
ချယ်လ်ဆီးအသင်းသည် လက်ရှိတွင် အသင်းကစားသမားများဖြစ်သည့် ဟာဗက်ဇ်ကို အာဆင်နယ်အသင်းထံသို့ ပေါင် ၆၅ သန်း၊ ကိုဗာချစ်ကို မန်စီးတီးအသင်းထံသို့ ပေါင် သန်း ၃၀၊ ကူလီဘာလီနှင့် မန်ဒီတို့ကို ဆော်ဒီလိဂ်သို့ နှစ်ဦးပေါင်း ပေါင် ၃၆ သန်းဖြင့် ရောင်းချထားပြီးဖြစ်သလို မေဆန်မောင့်ကို မန်ယူအသင်းထံသို့ ပေါင် သန်း ၆၀၊ လော့ဖ်တပ်ချိခ်ကို အေစီမီလန်အသင်းထံသို့ ပေါင် ၁၈ ဒသမ ၅ သန်းဖြင့် ရောင်းချရန် သဘောတူညီထားသည်။
ထို့ကြောင့် ချယ်လ်ဆီးအသင်းအနေ ဖြင့် ကစားသမားရောင်းချမှုမှ ရရှိထားသည့် ငွေကြေးများကို အသုံးပြုကာ ဘရိုက်တန် ကွင်းလယ်ကစားသမား ကိုင်စီဒိုအား ဒုတိယ အကြိမ်ကမ်းလှမ်းရန် စီစဉ်လာခြင်းဖြစ်သည်။ ထို့ပြင် ချယ်လ်ဆီးအသင်းသည် ဟာဗက်ဇ်၊ မေဆန်မောင့်၊ ကွန်တေတို့ ထွက်ခွာသွားသည့် ကွင်းလယ်ပိုင်းကို အင်အားဖြည့်တင်းမှုများ ပြန်လည်ပြုလုပ်ရန် စီစဉ်နေပြီး ကိုင်စီဒိုအပြင် ဆယ်လ်တာဗီဂိုအသင်းမှ စပိန်လူငယ်ကြယ်ပွင့် ဂါဘရီဗယ်ဂါ (၂၀ နှစ်) ကိုလည်း ခေါ်ယူရန် ပစ်မှတ်ထားနေကြောင်း Daily Mail က ဖော်ပြခဲ့သည်။
