ဘယ်လ်ဂျီယံအသင်းခေါင်းဆောင်လက်ပတ်ကို တောင်းဆိုခဲ့သည်ဟု နည်းပြ၏ပြောကြားမှုအပေါ် ကော်တိုအာ ငြင်းဆန်

ဘယ်လ်ဂျီယံအသင်းခေါင်းဆောင်လက်ပတ်ကို တောင်းဆိုခဲ့သည်ဟု နည်းပြတယ်ဒယ်စကိုမှ ပြောကြားမှုအပေါ် အသင်းဂိုးသမား ကော်တိုအာက ငြင်းဆန်ခဲ့ကြောင်းသိရသည်။  

ဇွန်လ ၁၇ ရက်က သြစတြီးယားအသင်းနှင့် ယူရိုခြေစစ်ပွဲတွင် လူကာကူကို အသင်းခေါင်းဆောင်အဖြစ် ကစားစေမှုအတွက် ကော်တိုအာမှာ မကျေမနပ်ဖြစ်ကာ အသင်းလူစာရင်းမှ နုတ်ထွက်ခဲ့သည်ဟု တယ်ဒက်စကိုက ဖွင့်ဟခဲ့သည်။

သို့သော် ကော်တိုအာက တယ်ဒယ်စကို၏စကားများကို ကြားရသည့်အတွက် များစွာအံ့အားသင့်မိကြောင့် ကိုယ်ပိုင်ဝက်ဘ်ဆိုက်မှတစ်ဆင့် ဖြေရှင်းခဲ့သည်။ “စကားပြောဖို့ သူ့ကို ကျွန်တော် တောင်းဆိုခဲ့တာပါ။ အားလုံးကောင်းကျိုးအတွက်ဖြစ်ပြီး အတိတ်မှာ ကျွန်တော့်တို့ကို နာကျင်စေခဲ့တဲ့အရာတွေ ရှောင်ရှားနိုင်ဖို့အတွက် ဘယ်လိုဆုံးဖြတ်ခဲ့သလဲဆိုတာ ရှင်းပြပေးဖို့ပါပဲ။ ကံမကောင်းစွာပဲ ကျွန်တော် မျှော်လင့်ထားသလို ဖြစ်မလာခဲ့ပါဘူး”ဟု ကော်တိုအာက သူ၏ဝက်ဘ်ဆိုက်မှတစ်ဆင့် ပြောကြားခဲ့သည်။ 

ဘယ်လ်ဂျီယံအသင်း၏ အသင်းခေါင်းဆောင်အဖြစ် ဒီဘရိုင်းနားကို ခန့်အပ်ထားပြီး ကော်တိုအာနှင့် တိုက်စစ်မှူး လူကာကူကို ဒုတိယအသင်းခေါင်းဆောင်အဖြစ် တာဝန်ပေးထားခြင်းဖြစ်သည်။ ဒီဘရိုင်းနား ဒဏ်ရာရရှိနေမှုကြောင့် ဇွန်လ ၁၇ ရက် သြစတြီးယားနှင့်ပွဲတွင် လူကာကူ၊ ဇွန်လ ၂၀ ရက် အက်စ်တိုးနီးယားနှင့်ပွဲတွင် ကော်တိုအာကို အသင်းခေါင်းဆောင်အဖြစ် တာဝန်ပေးရန် စီစဉ်ထားသည်ဟု တယ်ဒယ်စကိုက ရှင်းလင်းခဲ့သည်။ 

ကော်တိုအာက ဒူးဒဏ်ရာကြောင့် အသင်းလူစာရင်းမှ နုတ်ထွက်ခြင်းဖြစ်သည်ဟု ပြောကြားခဲ့သည်။